ՀԱԿ անդամ Գուրգեն Եղիազարյանը ողջունում է խորհրդարանական 4 ոչ կոալիցիոն ուժերի հանդիպումները:
«Բայց չեմ էլ մտածում, որ 4 ուժի ձևաչափը պահպանվելու է: Իմ կարծիքով՝ կմնան երկու կուսակցություններ, դա չեմ ասի՝ գաղտնիք է, չեն միավորվի, առաջ կշարժվեն երկուսը»,- այսօր «Ֆորում» ակումբում ասաց պարոն Եղիազարյանն ու պատմեց, որ արդեն նկատել է՝ ինչպես են իշխանությունները աշխատում մյուս երկու կուսակցությունների հետ. «Տեսնում եմ իշխանության ձեռագիրը, ինչպես են՝ մյուս երկուսի հետ աշխատում: Եւ արդեն նախադրյալներ կան, որ միգուցե այս չորսի ճանապարհը շատ երկար չլինի, եթե, իհարկե Սերժ Սարգսյանի իշխանությունը անմիջապես չկործանվի, այս տարբերակն էլ կա»:
Հարցին՝ որքանով է վերջին տարբերակն իրատեսական, պարոն Եղիազարյանն ասաց. «Ուշադիր զննեք՝ մկնիկն արդեն իրեն կախել է, սառնարանում է կախել, որովհետեւ ուտելու բան չկա: Ցանկացած քաղաքացի իր ընտանեկան բյուջեի վատթարացումը զգում է, վերջին երեք ամիսներին ավելի է վատացել ժողովրդի վիճակը»:
Նա նաեւ կարծիք հայտնեց, որ իշխանությունները սարսափած են քառյակի համատեղ գործունեությունից. «Երբ որ ցույց տվեցին Յանուկովիչի ոսկե զուգարանները, իրենք գնացին սեփական ոսկե զուգարանները սկսեցին փոխել»:
Կարդացեք նաև
ԱԺ նախկին պատգամավոր Լեռնիկ Ալեքսանյանն էլ ասաց, որ ինքը ևս դրական է համարում ընթացող բանակցությունները.«Սրանով ավելի կհստակեցվի ընդդիմադիր դաշտի լղոզվածությունը, և հասարակության, ընդդիմադիր դաշտի եւ իշխանությունների համար պարզ կլինի՝ ով ով է, ու ով ինչի համար է միավորվում… սա առաջընթաց է մեր քաղաքական դաշտում: Ընդդիմությունն ու իշխանությունը մի ամբողջություն են, սա առողջացնում է իշխանական ամբողջ համակարգը»:
Չհամաձայնեց պարոն Եղիազարյանը ու ասաց, որ իշխանություններին առողջացնել հնարավոր չէ, որովհետեւ. «Անհույս հիվանդ է: Կարելի է առողջացնել թեթեւ մրսածություն ունեցող իշխանությանը»:
Պարոն Ալեքսանյանն էլ հակադարձեց. «Այն համակարգը, որն այսօր առկա է Հայաստանում, ներդրվել է դեռևս 1990-ականներին: Կա հասարակական դժգոհություն, բայց չպետք է դա օգտագործել կուսակցական շահերի համար: Համակարգը պետք է առողջացվի, վարչապետին փոխելով որևէ բան չի փոխվի երկրում: Ես չեմ ասում, որ ամեն ինչ լավ է, բայց ձեռնարկված քայլերը, պետք է նկատել»:
Արփինե ՍԻՄՈՆՅԱՆ
