ՀՀ ոստիկանությունն ընդդեմ քաղաքացիական ակտիվիստ Սուրեն Սահակյանի գործով Վարչական դատարանում այսօր նախնական նիստն էր:
Ոստիկանությունը պահանջում է ակտիվիստին 50.000 դրամի չափով վարչական պատասխանատվության ենթարկել:
Հիշեցնենք, որ ակտիվիստին բերման են ենթարկել քաղաքապետարանի առջեւից խաղաղ հավաք անցկացնելու ժամանակ:
Ակտիվիստի պաշտպան Արտակ Զեյնալյանը պահանջեց մերժել հիմնական հայցը` պնդելով, որ այն զուրկ է իրավական եւ փաստական հիմքից:
Կարդացեք նաև
Նա նաեւ հակընդդեմ հայց ներկայացրեց` պահանջելով ոստիկանների գործողությունները ճանաչել ոչ իրավաչափ:
Դատարանում հարցաքննվել է նաեւ ակտիվիստին բերման ենթարկելու արձանագրությունը կազմած ոստիկանը:
Ոստիկանը, ըստ պարոն Զեյնալյանի, դեպքի մասին կարեւոր փաստերը իր խոսքով մոռացել էր, իսկ իրենց համար նպաստավոր ու ոչ վտանգավոր փաստերը լավ մտաբերում էր:
Այնուամենայնիվ, ըստ փաստաբանի, հարցաքննվող ոստիկանը նաեւ ակտիվիստի համար բարենպաստ հանգամանքներ է մտաբերել. «Նա անհարմար վիճակի մեջ ընկավ, որովհետեւ մեզ համար շատ բարենպաստ հանգամանքներ բացահայտեց: Որով ակնհայտ էր, որ մեր վստահորդի իրավունքների միջամտության ողջ ընթացակարգը տեղի է ունեցել խախտումներով եւ մեր վստահորդին ազատազրկելը հետապնդել է նրա`խաղաղ հավաքների ազատության իրավունքը սահմանափակելու նպատակ»:
Ոստիկանությունը պահանջում է Սուրեն Սահակյանին պատասխանատվության կանչել Վարչական իրավախախտումների մասին օրենքի 182 հոդվածով`ոստիկանի օրինական պահանջը չկատարելու համար:
Արփինե ՍԻՄՈՆՅԱՆ
