Մարտի 13-ին ՀՀԿ ԳՄ նիստի ավարտից հետո Էդուարդ Շարմազանովը լրագրողների հետ հանդիպման ժամանակ մեկնաբանելով Վլադիմիր Ժիրինովսկու հայտարարությունը, կապված Արցախի հետ, նշեց, որ չնայած Արցախի նախագահի խոսնակ Դավիթ Բաբայանը ներկայացրել է պաշտոնական դիրքորոշում, իրենք էլ ՀՀԿ-ի դիրքորոշումը կարող ենք ներկայացնել. «Մեր կարծիքը մնում է անփոփոխ, որն էլ հետեւյալն է`1991 թվականի դեկտեմբերի 10-ին Արցախի ժողովուրդը հանրաքվեով որոշել է Արցախի ճակատագիրը ու բնակչության ճնշող մեծամասնությունը կողմ է քվեարկել ու այսօր փաստացի Արցախը անկախ պետություն է ու մենք պետք է ամեն ինչ անենք, որ հասնենք Արցախի հանրապետության միջազգային ճանաչմանը»:
Դիտարկմանը, թե ինչ միտում է տեսնում Ռուսաստանի կողմից նման հայտարարությունների համատեքստում, Շարմազանովն ասաց. «Ռուսաստանը ԱՄՆ-ի եւ Ֆրանսիայի հետ մեկտեղ ԵԱՀԿ Մինսկի խմբի համանախագահ երկիր է ու նրա պաշտոնական դիրքորոշումը բազմիցս հայտարարել է երկրի նախագահը` Վլադիմիր Պուտինը երկու գործընկեր համանախագահ երկրների նախագահների հետ ընդունած հայտարարության մեջ, որտեղ հստակ նշվում է, որ խնդիրը պետք է լուծվի երեք հիմնարար սկզբունքների հիման վրա, դա ինքնորոշման իրավունքն է, ուժի չկիրառումը եւ տարածքային ամբողջականությունը: Այլ պաշտոնական տեսակետ ՌԴ-ն, ինչպես նաեւ համանախագահող երկրները չունեն, համենայնդեպս ես չեմ լսել»:
Եվա ՀԱԿՈԲՅԱՆ
