Aravot.am-ի հետ զրույցում Կրթության ազգային ինստիտուտի (ԿԱԻ) փոխտնօրեն Անահիտ Բախշյանն իր դիտարկումները հայտնեց «Քրիստոնյաներն ընդդեմ համարակալման» հ/կ նախագահ Խաչիկ Ստամբոլցյանի` «Ես և շրջակա աշխարհը» դասագրքի, ծրագրի և դրա չափորոշիչի շուրջ բարձրացված մտահոգություններին: Հիշեցնենք, որ Ստամբոլցյանը մտահոգություն էր հայտնել, որ այս առարկայի չափորոշիչ ծրագրի հիմքում գենդերի խորացված ուսումնասիրությունն է:
Անահիտ Բախշյանը այդ ամենը հերյուրանք անվանեց ու նշեց. «Բավական է «ասում են, լսել եմ» կամ անտեղյակության հետևանքով որևէ միտք մեկնաբանողները, ովքեր չեն կարդացել ու չեն խորացել տվյալ նյութի մեջ, ապակողմնորոշեն հասարակությանը»:
Անդրադառնալով Խաչիկ Ստամբոլցյանի պնդումներին, թե «ծրագրով երեխային բացատրում են, թե ինչ է գենդերը, գենդերային տարբերությունները: Աշակերտներին սովորեցնելու են, որ ամեն ինչ սեռով չէ պայմանավորված, սեռն ընտրովի է», տիկին Բախշյանն ասաց. «Բացարձակ ապատեղեկատվություն է, նման ոչ մի նախադասություն ու միտք չկա ոչ չափորոշիչում, ոչ ծրագրում: Հիմա Խաչիկ Ստամբոլցյանի համար անդրադառնամ չափորոշչի կառուցման տրամաբանությանը, որը հետևյալն է. նվազագույն մակարդակում երեխան պետք է «զանազանի մարդկանց միջև գոյություն ունեցող տարիքային, սեռային և աշխատանքային տարբերությունները», երկրորդ մակարդակում` «հասկանա հասարակության ստեղծած որոշ սեռային կարծրատիպերի պայմանական լինելը, օրինակներ բերի» որը վերաբերվում է հիմնականում սեռով պայմանավորված աշխատանքային կարծրատիպերին, ինչպես օրինակ տիեզերագնացը կարող է նաև կին լինել: Այնուհետև, երրորդ մակարդակում երեխան պետք է «գիտակցի իրեն շրջապատող մարդկանց տարբեր դերերի և աշխատանքների փոխկախվածությունը, հասկանա դրանց կարևորությունը, կարողանա օրինակներով հիմնավորել»: Չափորոշչի երեք մակարդակների զարգացման տրամաբանությունից ակնհայտ է, որ նման հիվանդագին մտահոգությունները մտացածին են ճիշտ այնպես, ինչպես աղմուկ բարձրացվեց «Կանանց և տղամարդկանց իրավահավասարության մասին» օրենքի քննարկումների ժամանակ: Պարզվում է, մարդիկ խոսում են` առանց օրենքը կարդալու կամ տվյալ դեպքում դասագիրքն ու չափորոշիչը կարդալու: Ցավում եմ, որ տվյալ դեպքում ՀՀ ԿԳ նախարարն անմիջապես իր հրամանով տեղի տվեց ու ստացվեց, որ Խաչիկ Ստամբոլցյանի մտահոգությունն արդարացված էր և փոփոխությունն էլ` անհրաժեշտ: Դե արի ու մի ասա «каждый понимает по мере своей испорченности»:
Տաթև ՀԱՐՈՒԹՅՈՒՆՅՆԱՆ
