Ազգային ժողովում այսօր շարունակվեց երեկ ընդհատված «Ավտոմոբիլային տրանսպորտի մասին» եւ մի շարք օրենքներում փոփոխությունների փաթեթը: Օրենսդրական փաթեթը ներկայացնում էր ՀՀ կառավարության աշխատակազմի «Օրենսդրության կարգավորման ազգային կենտրոն» ծրագրի իրականացման գրասենյակ»-ի տնօրեն Արմեն Եղիազարյանը:
Ըստ օրենքի նախագծի՝ Երեւան քաղաքում ընդհանուր օգտագործման ավտոմոբիլային տրանսպորտով ուղեւորափոխադրումներ իրականացնելու համար լիցենզիա այլեւս չի պահանջվի, կգործի մեկ պատուհանի սկզբունքը, ինչի արդյունքում վարչարարությունը կկրճատվի, կսահմանվի ուղեւորափոխադրման հստակ գին եւ այլն:
Պատգամավորները հետաքրքրվում էին, թե ինչո՞ւ է այս օրինագիծը միայն Երեւանին առնչվում, ի պատասխան Արմեն Եղիազարյանն ասաց, որ հնարավոր է հետագայում միջքաղաքային տրանսպորտին էլ վերաբերի:
Նախագծով նախատեսվում է «Օպերատորի» դերակատարություն, որը լինելու է «Երեւան քաղաքում ընդհանուր օգտագործման ավտոմոբիլային տրանսպորտով ուղեւորների ներքաղաքային կանոնավոր փոխադրումներ իրականացնող 100 տոկոս համայնքային մասնակցությամբ կազմակերպություն»: Հենց այս Օպերատորն էլ կսահմանի քաղաքային հանրային տրանսպորտի երթուղիները եւ գները:
Կարդացեք նաև
Օրենքի նախագծում նշված է, որ օրենքի ընդունումից հետո ակնկալվում է անցում՝ միասնական վճարային համակարգի, ինչը կձերբազատի վարորդների կողմից փոխադրավարձի հավաքման գործընթացից եւ անցում կկատարվի վճարման քաղաքակիրթ եղանակների: Խոսքը եվրոպական շատ երկրներում ընդունված միասնական տոմսերի մասին է, որով կարելի է նստել բոլոր ավտոբուսներն ու այլ քաղաքային տրանսպորտները:
Ինչ վերաբերում է տրանսպորտի սակագներին, ըստ օրինագիծը ներկայացնող Արմեն Եղիազարյանի՝ միջազգային փորձը ցույց է տալիս, որ գները չեն իջնում, միայն բարձրանում են, սակայն գին որոշողը լինելու է համայնքի ավագանին:
Թեեւ Ազգային ժողովի տնտեսական հարցերի հանձնաժողովն արդեն դրական եզրակացություն է տվել այս նախագծին, սակայն քննարկումների ընթացքում ԱԺ նախագահ Հովիկ Աբրահամյանը եկավ այն եզրակացության, որ շահագրգիռ կողմերի մասնակցությամբ խորհրդարանական լսումների կարիք կա եւ առաջարկեց հանձնաժողովի նախագահ Վարդան Այվազյանին անցկացնել նման լսումներ:
Մելանյա ԲԱՐՍԵՂՅԱՆ
