«Սպառողների խորհրդատվական կենտրոն» հ/կ նախագահ Կարեն Չիլինգարյանի կարծիքով՝ հայ սպառողների իրավունքներն ամբողջովին ոտնահարված են. «Սպառողը որեւէ ոլորտի հետ կապված խնդիր ունենալու դեպքում չգիտի, թե ում դիմի»:
Նրա պնդմամբ` չկա մի այնպիսի «թեժ գիծ», որ սպառողը կարողանա դիմել խնդիր ծագելու դեպքում եւ ստանալ իրեն հուզող հարցերի պատասխանները:
Պրն Չիլինգարյանի կարծիքով՝ սպառողները իրենց իրավունքներին ծանոթ չեն, եւ չգիտեն, թե որ օրենքներն են կարգավորում իրավունքները.
«Սպառողները շատ հազվադեպ են դիմում դատարան, չեն ցանկանում ընկնել քաշքշուկների մեջ: Նրանք միանգամից են հետ կանգնում այն ժամանակ, երբ գործը կարող է հասնել դատարան:
Միայն մեծ գումարների հետ կապված խնդիրների դեպքում են դիմում դատարան, դա էլ լինում է չափազանց հազվադեպ»:
Կարդացեք նաև
Նա օրինակ է բերում, որ եթե սպառողը գնում է մի հագուստ, տանում է տուն եւ տեսնում է, որ այն ենթակա է խանութին ետ վերադարձնելու, ապա սպառողների իրավունքների պաշտպանության օրենքի 23-րդ հոդվածի համաձայն` ապրանքը սպառողը իրավունք ունի ետ վերադարձնել 14 օրվա ընթացքում կամ փոխանակել այն:
Սակայն նա ասում է, որ Հայաստանի բոլոր վաճառակետերում այս օրենքը չի կիրառվում. «Մարդիկ հիմնականում համակերպվում են այս իրավիճակի հետ` մինչդեռ կարելի է մինչեւ վերջ գնալ եւ գործը հասցնել դատարան: Սակայն դատարան դիմելու համար էլ է գումար հարկավոր, այս իսկ պատճառով սպառողը ետ է կանգնում եւ զրկվում իր իրավունքները պաշտպանելու հնարավորությունից»:
Էլյա ՀՈՎՀԱՆՆԻՍՅԱՆ
