Հեռուստատեսության եւ ռադիոյի ազգային հանձնաժողովի նախագահի տեղակալ ԺԻՐԱՅՐ ԴԱԴԱՍՅԱՆԸ մասնավոր հեռուստաընկերությունները ֆինանսապես աջակցելու առումով նախագիծը դրական է գնահատում, առավել եւս, որ խոսքը գերշահույթ ապահովելու մասին չէ, այլ հեռուստաընկերությունների գովազդի սահմանափակման պատճառով կորցրած գումարները վերադարձնելուն է վերաբերում:
«Այսօր հեռուստաընկերություններն իրոք շատ վատ վիճակում են, իսկ լրացուցիչ ապրանքի գովազդի թույլտվությունը նրանց հնարավորություն կտա համալրել բյուջեն: Այդուհանդերձ չէի ցանկանա, որ մեր եթերում թունդ ալկոհոլային խմիչք գովազդենք: Նույն հաջողությամբ կարող ենք հետագայում ծխախոտ գովազդել` դառնալով ծխելու երեւույթի ջատագովը:
Պարզապես սա այլընտրանք չունեցող տարբերակ է: Լավ կլինի, որ դա ժամանակավոր միջամտություն լինի, մինչեւ գումար աշխատելու այլ տարբերակներ ստեղծվեն»,- ասում է Ժ.Դադասյանը:
Ինչ վերաբերում է ոգելից խմիչքի գովազդի թույլատրմանը` զրուցակիցս նկատեց, որ հայերս ոգելից խմիչքի գովազդից վախենալու պատճառ չունենք, քանի որ մեր ազգային տեսակով հակված չենք հարբեցողության: Ուստի այս նախագծի ընդունումն էլ այնքան մեծ մտահոգություն չպետք է առաջացնի, մինչդեռ, օրինակ, Ռուսաստանում, Լեհաստանում թունդ ալկոհոլային խմիչքների գովազդումն իրոք խնդրահարույց է` ելնելով խմիչքի հանդեպ նրանց «ազգային» սիրուց:
Կարդացեք նաև
Խնդրի մասին զրուցեցինք նաեւ հոգեբան ԱԼԲԵՐՏ ՆԱԼՉԱՋՅԱՆԻ հետ` պարզելու համար, թե գովազդն ի՞նչ անմիջական ազդեցություն կարող է գործել մարդու հոգեբանության, նրա վարքի վրա, որպեսզի հասկանանք, թե ոգելիցի գովազդը որքանո՞վ է վնասակար մեր հասարակությանը։
Հոգեբանը նախ զգուշացրեց, որ օրինագիծը մշակողների սահմանած ժամանակահատվածը, որի ընթացքում կարելի է գովազդել թունդ ալկոհոլը, ամենեւին էլ «անվտանգ» չէ դեռահասների համար, քանի որ նրանք հեռուստաէկրանի առջեւ նստում են հատկապես երեկոյան ժամերին` մինչեւ կեսգիշեր: Իսկ այդ տարիքը առավել խոցելի է ընկալունակության առումով, ու գովազդն էլ կարող է նրանց վրա համապատասխան բացասական ազդեցություն գործել:
Պատանիների շրջանում մեծ երեւալու հակում կա, եւ նրանք ավելի շատ են հակված տարվելու վնասակար սովորույթներով, որոնք, իրենց կարծիքով, մեծացնում են, «հասունացնում»: Եվ եթե գովազդի միջոցով դեռահասը հասկանա, որ, օրինակ, ոգելից խմելը թույլատրելի է` նրան այլեւս հնարավոր չի լինի հետ պահել: Արդյունքն այն կլինի, որ պատանիների, շատ երիտասարդների շրջանում խմիչք օգտագործողների թիվը կավելանա, կամ օգտագործողները կսկսեն ավելի շատ խմել:
Թագուհի ԱՍԼԱՆՅԱՆ
Հոդվածն ամբողջությամբ՝ «Հայոց աշխարհ» թերթի այսօրվա համարում
