Քաղաքագետ Լևոն Մելիք-Շահնազարյանն այսօր լրագրողներին ներկայացրեց իր նոր «Ադրբեջանական ագրեսիան ընդգծում է Լեռնային Ղարաբաղի սահմանները» գիրքը, որում ներառված են 1992 թվականին հետախուզության շնորհիվ Ադրբեջանից ձեռք բերված գաղտնի փաստաթղթեր: Քաղաքագետը ասում է, որ փաստաթղթեր կան, որ ընդամենը մեկ օրինակով են եղել:
Պրն Մելիք- Շահնազարյանի խոսքերով գրքում հրապարակված փաստաթղթերը ամբողջովին կոտրում են Ադրբեջան-Հայաստան բանակցությունների տրամաբանությունը. «Ադրբեջանը ամբողջ աշխարհին ներկայացրել է՝ իբրեւ Հայաստանը կատարել է ագրեսիա եւ գրավել իր տարածքի մի մասը: Իրականում, այս փաստաթղթերը ցույց են տալիս, որ ագրեսիա կատարել է հենց Ադրբեջանը: Նրանք դա չեն թաքցնում: Իրենք իրենց հետ գաղտնի փաստաթղթերով են խոսում»:
Բանախոսը հայտնեց, որ համաձայն փաստաթղթերում հրապարակված տվյալների՝ Ադրբեջանը փորձել է կատարել ցեղասպանություն Արցախի բնակչությամբ հանդեպ: «Վերնագիրը ամբողջությամբ համապատասխանում է իրականությանը: Այսօրվա սահմանները Ադրբեջանի ռազմական ագրեսիայի հետեւանքն են: Եվ ոչ մի բանակցություններ տարածքների մասին հիմք չունեն: Բարեբախտաբար փաստաթղթերը ռուսերեն են, այլ ոչ թե ադրբեջաներեն, որը թույլ է տալիս ավելի հավաստի տեղեկություն ունենալ»:
Պրն Մելիք-Շահնազարյանը ներկայացրեց գրքում հրապարակված երկու փաստաթուղթ, որոնցում հստակ նշվում է, թե ինչպես է ադրբեջանական բանակը գողանում սովետական բանակի զենքը, վարձկաններ է գնում տարբեր երկրներից՝ կռվելու համար, թե ինչպես են Ասկերանը ռմբակոծել հենց Ադրբեջանցիները: Նրա պնդմամբ, խոսքը գնում է ուղղակի ցեղասպանության մասին:
Կարդացեք նաև
Նա նաեւ փաստեր ներկայացրեց, որ պլաններ են մշակվել , թե ինչպես անել, որ արագ ոչնչացվեն հայկական զինված ուժերը: Քաղաքագետի խոսքերով՝ փաստաթղթերից մեկը վկայում է այն մասին, որ Ադրբեջանի անվտանգության ծառայության պետը ցանկացել է փակել Հայաստանի սահմանը՝ հնարավոր օգնությունը կանխելու նպատակով. «Սա ապացուցում է այն փաստը, որ Հայաստանը չի մասնակցել մարտերին եւ լիարժեք օգնություն ցույց տալ Արցախի ժողովրդին, չի կարողացել»:
Մանրամասն՝ տեսանյութում
Էլյա ՀՈՎՀԱՆՆԻՍՅԱՆ
