Գովազդի մասին և Հեռուստատեսության ու ռադիոյի մասին օրենքներում փոփոխություններ ու լրացումներ կատարելու մասին նախագծերի քվեարկությունից հետո ՀՅԴ խմբակցության անդամ Արծվիկ Մինասյանը ԱԺ նախագահ Հովիկ Աբրահամյանից խնդրեց ևս մեկ անգամ ներկայացնել քվեարկության պատկերը:
Ավելի ուշ լրագրողները ՀՅԴ խմբակցության քարտուղար Աղվան Վարդանյանից հետաքրքրվեցին, թե ի՞նչն էր հետաքրքրում ՀՅԴ-ական պատգամավորներին: Պարոն Վարդանյանն ասաց, որ իրենք կասկածներ ունեն քվեարկության արդյունքների հետ կապված: Այդ կասկածները, ըստ բանախոսի, դեռ պետք է ստուգվեն, բայց ՀՅԴ-ում կասկածում են, որ ՀՀԿ-ական պատգամավորներից ոմանք իրենց տեղում չեն եղել, սակայն նրանց փոխարեն «կողմ» են քվեարկել:
Նշենք, որ խորհրդարանական ընդդիմությունն ու այլընտրանքը չեն մասնակցել այս օրինագծերի քվեարկությանը: ՀՀԿ խմբակցությունից օրինագծերին դեմ է քվեարկել ԱԺ առողջապահության, մայրության և մանկության հարցերի մշտական հանձնաժողովի նախագահ Արա Բաբլոյանը, ձեռնպահ՝ ՀՀԿ-ական Դավիթ Հարությունյանն ու ՕԵԿ-ական Մհեր Շահգելդյանը:
«Պարոն Բաբլոյանն իր ամբողջ կյանքում մղել է պայքար ալկոհոլի ու ծխախոտի դեմ: Տարօրինակ կլիներ, որ էդ մարդը կողմ քվեարկեր: Իհարկե, բազմաթիվ այլ մարդիկ ևս կան ՀՀԿ շարքերում, որոնք այնուամենայնիվ կողմ քվեարկեցին, բայց դա իրենց անձնական խնդիրն է»,- ասաց Աղվան Վարդանյանը:
Կարդացեք նաև
Հիշեցնենք, որ այս փոփոխություններով ԶԼՄ-ներով արգելվում է ծխախոտի գովազդը, փոխարենը օրվա որոշակի ժամերի թույլատրվելու է թունդ ոգելից խմիչքի գովազդը:
Նելլի ԳՐԻԳՈՐՅԱՆ
