«Հայաստանի վրա ճնշում կլինի Ղրիմը ճանաչելու հորդորով»,- այսօր «Մեդիա կենտրոնում» հայտարարեց «Մոդուս վիվենդի» կենտրոնի ղեկավար Արա Պապյանը` զարգացումներն Ուկրաինայում թեմայով քննարկման ժամանակ:
Պարոն Պապյանը կանխատեսումներ անելով նշեց, որ այս դիմակայության հետևանքով Ռուսաստանը կարող է հայտնվել խորը մեկուսացման մեջ, և Հայաստանը, որպես դաշնակից, նույնպես կարող է հայտնվել մեկուսացման մեջ՝ դրանից բխող բոլոր հետեւանքներով:
«Նորավանք» գիտակրթական հիմնադրամի տնօրեն Գագիկ Հարությունյանը հակադարձեց. «Գլոբալացված տնտեսությունում դժվար է հասնել մեկուսացման այնպիսի խոշոր երկրի, ինչպիսին Ռուսաստանն է»: Այնուհետև պարոն Հարությունյանը նշեց, թե զուգահեռներ չի տեսնում Ղարաբաղի և Ղրիմի միջև ու նկատեց. «Ղարաբաղյան խնդիրը էապես տարբերվում է Ղրիմի խնդրից»:
Անդրադարձ կատարվեց նաև Հայաստանի` Մաքսային միության անդամակցության հարցում նկատվող շտապողականությանը: Գագիկ Հարությունյանը շտապողականություն չի տեսնում. «Ամեն ինչ գնում է` ըստ պլանի: Պայմանավորվածություն կար, որ մայիսի 15-ին պետք է փաստաթղթերը կազմվեն»: Պարոն Հարությունյանը հավաստիացրեց, թե Մաքսային միության անդամակցումը մեզ ձեռնտու է, և «դժվար է պատկերացնել ու քաղաքականն ու տնտեսականը տարանջատել ռազմականից, դա առաջին հերթին ուղղված է մեր անվտանգությանը»: Այս առիթով պարոն Հարությունյանը հղում կատարեց թուրքական և ադրբեջանական այն փորձագետների կարծիքներին, համաձայն որոնց` «Մաքսային միություն մտնելով Հայաստանը գրեթե անհնարին դարձրեց ռազմական ուժով Ղարաբաղի գրավումը թուրքաադրբեջանական կողմից»:
Կարդացեք նաև
Արա Պապյանն ի հակադրումն ասվածի` նշեց. «Չեմ կարծում, որ Թուրքիան և Ադրբեջանը ԼՂՀ-ի` ռազմական ճանապարհով գրավելու խնդիր են դրել: Նրանք վաղուց որդեգրել են ՀՀ-ն տնտեսապես քայքայելու և մարդաթափ անելու քաղաքականությունը»:
Պարոն Պապյանը նաև նշեց, թե Մաքսային միության անդամակցությունից հետո ՀՀ-ում սպառողական մի շարք ապրանքների գներ կաճեն, ինչը կհանգեցնի արտագաղթի տեմպերի աճին: Այնուհետև նկատեց. «Քսան տարի հետո մարդ չենք ունենա Հայաստանում: Մենք ֆիզիկապես պաշտպանվելու խնդիր չունենք, խնդիրն այն է, թե մենք ոնց ենք տնտեսապես պաշտպանվելու»:
Ուկրաինական զարգացումների և ՌԴ-ի արձագանքի ֆոնին ինչպիսի՞ն կլինի Հայաստանի ճակատագիրը, պարոն Պապյանը նշեց. «Կարծում եմ՝ Հայաստանի ճակատագիրը կորոշվի Ռուհանի եւ Ջոն Քերիի այցերով Հայաստան: Այս երկու այցերը կլինեն վճռորոշ»: «Ռուսաստանն արդեն իսկ դուրս է մղված ռազմական համագործակցության շատ ոլորտներից: Մեծ ութնյակն արդեն չեղյալ է հայտարարել իր հանդիպումը Սոչիում: Չկա մի երկիր, որը ի պաշտպանություն ՌԴ-ի պաշտոնական հայտարարություն արած լինի»:
Հայաստանի` հետագա վարքագծի և քաղաքականության մասին պարոն Հարությունյանն այսպիսի կարծիք հայտնեց. «Հայաստանը պետք է անի այն, ինչ հիմա անում է. իրեն դրսևորի բավականին զգուշավոր: Մյուս կողմից էլ ոչ ՀՀ-ն, ոչ էլ Ուկրաինան չէին շահի Ասոցացման համաձայնագիր ստորագրելով: Պաղեստինն էլ է Ասոցացման համաձայնագիր ստորագրել, բայց ոչինչ չի փոխվել, յուրաքանչյուր ժողովուրդ ինքը պիտի կարողանա զարգացնել իր երկիրը»:
Տաթև ՀԱՐՈՒԹՅՈՒՆՅԱՆ
