«Մենք ինչ էլ ձեզ համար անենք, միևնույն է, քիչ է: Դուք ավելիին եք արժանի»,-այսօր Երևանի պետական բժշկական համալսարանում ՀԵՀ-ի կողմից հայտարարված կրթաթոշակի մրցույթի արդյունքների ամփոփման արարողության ժամանակ հայտարարեց ՀՀ վարչապետ Տիգրան Սարգսյանը:
Այնուհետև նա շեշտեց. «Կառավարության կարևորագույնն խնդիրներից է, որ դուք ձեզ երջանիկ զգաք մեր հայրենիքում և ձեր ապագան կապեք մեր հայրենիքի հետ»:
Վարչապետը նաև տեղեկացրեց, որ ծրագիրը շարունակական է լինելու, քանի որ այն «ուսանողական ինքնակառավարման լավ ձև է. ինքներդ չափանիշներ եք սահմանում, ընտրում ում տաք, ինքներդ վերահսկում եք, տեսնում եք, թե գումարները ում են հասնելու»:
Հիշենենք, որ ՀՀ կառավարությունը կրթաթոշակի մրցույթի համար հատկացրել է 60 միլիոն դրամ: Այս տարի կրթաթոշակի արժանացան 780 ուսանողներ, իսկ դիմում-հայտ էր ներկայացրել շուրջ 1500 առաջին կուրսեցի:
Կարդացեք նաև
Հայաստանի երիտասարդական հիմնադրամի հոգաբարձուների խորհրդի համակարգող Կարեն Ավագյանը նկատեց. «Չնայած կան որոշ մարդիկ, ովքեր փնտրում են սև ու մութ կետեր այս մրցույթում, սակայն պետք է ասեմ, որ սև ու մութ կետեր չկան, և իզուր ժամանակ ու էներգիա թող չծախսեն։ Նախորդ 3 տարիներին մենք այս ծրագրի շրջանակներում արդեն 2150 ուսանողի ֆինանսավորել ենք, ևս 780-ն այսօր ստացան կրթաթոշակի հավաստագրեր։ Ծրագրի շարունակականությունն ապացուցում է, որ ուսանողներն ու կառավարությունը մեզ վստահում են, և մենք կարողանում ենք համապատասխան գումարը ճիշտ հասցեատիրոջը հասցնել»։
Նա վստահեցրեց, որ կրթաթոշակ ստանալու չափորոշիչները շատ հստակ են. բոլոր անապահով, ծնողազուրկ և գերազանց առաջադիմություն ունեցող ուսանողները, ովքեր ներկայացրել են փաստաթղթեր, ստանում են ուսման վարձի փոխհատուցում:
Նշենք, որ կրթաթոշակների հանձնման արարողությանը հրավիրվել էին ԱԺ բոլոր խմբակցությունների ներկայացուցիչները, սակայն նրանք չէին ներկայացել:
ԿԳ նախարար Արմեն Աշոտյանը շեշտեց. «Այն գերազանց առաջադիմությամբ ուսանողները, ովքեր ի վիճակի չեն ուսման վարձ վճարել, պետք է դուրս չմնան համակարգից: Իսկ կրթաթոշակների այս մրցույթը դրա լավագույն հնարավորությունն է»:
Aravot.am-ը զրուցեց նաև կրթաթոշակի արժանացած ուսանողների հետ: 1-ին կուրսեցի Տիգրան Սարգսյանը նշեց. «Հնարավորություն կունենանք ինչ-որ կերպով վարձը վճարել: Ինձ համար սա շատ մեծ օգնություն է: Հպարտ եմ նաև, որ կրթաթոշակը հենց վարչապետն ինձ հանձնեց, որ իմ անունն էլ էր Տիգրան Սարգսյան, ինքն էլ ասաց, որ շուտով վարչապետ եմ դառնալու»:
Տաթև ՀԱՐՈՒԹՅՈՒՆՅԱՆ
