«Եվ երբ որ նա դառնա բավական երիտասարդ թոշակառու, համոզված եղեք, որ մի քանի ամսից նա կնկատի, թե ինչպիսի հրեշավոր ու կոռումպացված համակարգ է Գլխավոր դատախազությունում, թե ինչպիսի հրեշավոր մեթոդներով են Հայաստանում վարում նախաքննությունը: Եվ երբ որ այս ամենը նկատի, նա միանգամից կդառնա մարդու իրավունքների պաշտպանության, արդարության, ազատության մարտիկ, կսկսի պայքարել հանուն իշխանափոխության»,- այսօր խորհրդարանում Քննչական կոմիտեի մասին օրենքի նախագծի քննարկման ժամանակ իր ելույթում հայտարարեց ընդդիմադիր պատգամավոր Նիկոլ Փաշինյանը:
Ավելի ուշ, ՀՀԿ-ական պատգամավոր Վարդան Այվազյանի հետ զրույցում լրագրողներից մեկը հետաքրքրվեց`իր կարծիքով «երիտասարդ թոշակառուի» կարգավիճակում Աղվան Հովսեփյանը կլինի՞ այնպիսին, ինչպես բնութագրեց Նիկոլ Փաշինյանը: «Աղվան Հովսեփյանին ես ճանաչում եմ, որպես պարկեշտ և օրինապաշտ մարդ և ինձ համար լուրջ տպավորություններով ու սկզբունքային հարցերով անձնավորություն է եղել: Ասեմ` շատ շփվել եմ, ոչ թե պաշտոնի, այլ ծառ տնկելու, բնության հետ կապված: Իսկ որպես դատախազ շատ լավն է…ձեզ ոնցա՞ պետք` ասեմ»,- ասաց Վարդան Այվազյանը`հավելելով, որ ինքն իր գնահատականներում անկեղծ է. «Ինչո՞ւ պետք է ազնիվ չլինեմ, ոչ մոնապոլ ճյուղեր ունեմ, ոչ էլ աշխատող դատախազությունում»:
Մեկ այլ դիտարկման, թե Աղվան Հովսեփյանի գլխավոր դատախազ աշխատելու տարիներին աղմկահարույց որևէ գործ չի բացահայտվել, հետևաբար նոր ձևավորվող քննչական մարմին ղեկավար նրան նշանակելը որքանո՞վ է նպատակահարմար, Վարդան Այվազյանը պատասխանեց. «Շատ դեպքերում երբ կառույցը կարում եք անձին կամ անձը կարում եք կառույցին, ստացվում է հակառակ պատկեր. այդ կառույցը անհրաժեշտ է, որպեսզի քննչական մարմինը լինի անկախ: Բացի ոչ միայն ՀՀ-ում, այլ ամբողջ աշխարհում չբացահայտված գործերը շատ են»:
Բայց քանի որ կառույցը ինստիտուցիոնալ առումով դեռ չկա, Այվազյանը չգիտի եւ չի շտապում կանխատեսել, թե ո՞ւմ են նշանակելու դրա ղեկավար. «Աղվան Հովսեփյանի անուն է շրջանառվում: Կարողա նշանակվի, կարող է` չնշանակվի, կարող է` մի հինգ տարուց հետո գնա թոշակի…… »:
Կարդացեք նաև
Նելլի ԳՐԻԳՈՐՅԱՆ
