«Դեմ եմ» քաղաքացիական նախաձեռնության անդամները երեկ` մարտի 9-ին, Մաշտոցի պուրակում քննարկել են նախօրեին խաղաղ ցույցի ժամանակ իրենց նկատմամբ ոստիկանների կիրառած բռնություններին պատասխան տալու հարցը:
Նախաձեռնության ակտիվիստներն առայժմ ուսումնասիրում են ցույցը արձանագրած բոլոր տեսանյութերը, որ ոստիկանների բռնի գործողությունների փաստերը ձեռքներին գործեն:
«Հիմա պետք է պարզենք` ոստիկանները ցույցի մասնակիցների նկատմամբ կոնկրետ ինչ բռնի գործողություններ են արել, որովհետեւ բացի ցուցարարներից՝ նաեւ լրագրողներին էլ էին հրում: Տեսնենք` ինչ փաստեր ունենք ֆիքսված, դրանից հետո կոնկրետ քայլեր կձեռնարկենք»,- ասաց «Դեմ եմ» նախաձեռնության անդամ Արտաշես Արաբաջյանը:
Նախաձեռնության անդամ Հայկ Ավետիսյանն էլ պատմեց, որ երեկ նաեւ քննարկել են նոր արհմիությունների ստեղծման հարցը. «Դրա միջոցով աշխատողների ցանկացած տիպի խնդիր կարելի է լուծել»: Նրա խոսքով, արհմիությունների միջոցով նաեւ կազմակերպելու են գործադուլներ:
Կարդացեք նաև
Մեր հարցին, թե ինչքանով իշխանություններին հաջողվեց կենսաթոշակային պարտադիր կուտակային օրենքից բողոքողներին լռեցնել` ի հաշիվ աշխատավարձերի բարձրացման, Հայկ Ավետիսյանն ասաց, որ. «Որոշ հիմնարկներում այդ մեթոդով կարողացել են մարդկանց լռեցնել, որովհետեւ եթե հիմնարկը փոխհատուցում է աշխատողի աշխատավարձի նվազեցումը, մարդկանց մի մասը մտածում է` լավ կարիք չկա էլ պայքարելու: Ամեն դեպքում՝ չպետք է հետ կանգնել, որովհետեւ մարդիկ պետք է հասկանան , որ եթե այսօր իրենց աշխատավարձը չի նվազում, որովհետեւ գործատուն է վճարելու, ապա դա կարող էր լինել աշխատավարձի ավելացում»:
Արփինե ՍԻՄՈՆՅԱՆ
