Երեկ հանրապետության 40 համայնքներում տեղական ինքնակառավարման մարմինների ընտրություններ էին, որոնց ՀԱԿ-ը չմասնակցեց : Ինչո՞ւ եք այդքան անլուրջ վերաբերվում ՏԻՄ ընտրություններին՝ Aravot.am-ի հարցին, մարտի 10-ին, ՀԱԿ խմբակցության ղեկավար Լեւոն Զուրաբյանը հարցով պատասխանեց. «Մե՞նք ենք անլուրջ վերաբերվում»:
Ապա, շարունակելով, մեր զրուցակիցը նկատեց, որ ընտրություններին անլուրջ են վերաբերվում գործող իշխանությունները. «Որոնք ՀՀԿ-ն դարձրել են КПСС-ի նման մի կուսակցության, որն արդեն հասել է նրան, ինչպես բարի սովետական ժամանակներում, ամեն դպրոցի տնօրենը ՀՀԿ-ական է: Եվ ոչ միայն դպրոցների, այլ բոլոր այլ հաստատությունների ռեսուրսների օգտագործմամբ կեղծում են բոլոր ընտրությունները: Այ, իրենք են անլուրջ վերաբերվում Սահմանադրությանը եւ բոլոր օրենքներին»:
Դիտարկմանը`քանի որ ՀԱԿ-ի հիմնական խնդիրներից մեկն էլ Հայաստանում իշխանափոխությունն է, ինչո՞ւ փորձ չի արվում ներքեւից իշխանափոխության տարբերակը կիրառել`ՏԻՄ ընտրությունների միջոցով, Լեւոն Զուրաբյանը պատասխանեց. «Որովհետեւ վերեւից իշխանափոխության տարբերակն ավելի արդյունավետ է մեզ համար»:
Նելլի ԳՐԻԳՈՐՅԱՆ
