Այսօր Կապանի ծաղկի սրահներում ու նվերների խանութներում վաղ առավոտից աշխույժ առեւտուր է ընթանում: Մարզկենտրոնի ծաղկի վաճառման կետերում այսօր շրջայց կատարեցինք, պարզելու համար, թե մարտի 8-ին ինչ գներով են վաճառում ծաղիկները, տոնի առթիվ գների բարձրացում եղել է, թե` ոչ: Գնորդներն ասում են, որ ծաղիկները 200-500 դրամով ավելի թանկ են առնում այսօր՝ քան ոչ տոնական օրերին, բայց ռեկորդային գների չեն հասել: Անկախ գնային տարբերությունից՝ մայրերի ու սիրելիների համար նախընտրում են ամենագեղեցիկ ծակեփնջերը գնել: Հոլանդական կարմիր վարդի գները տարբեր ծաղկի սրահներում տարբեր են՝ 700, 1000, 1200, 1500,1800 դրամ եւ այլն, կակաչներն ու գերբերաները՝ 400-600 դրամ, իսկ տարբեր ծաղիկներից հավաքված ծաղկե կոմպոզիցիաները սկսում են 2000-3000 դրամից:
Ծաղկի սրահների աշխատողները նշում են, որ բավականին ակտիվ է շարժը, պատվերները շատ են, հազիվ են հասցնում ճանապարհել հաճախորդներին, իսկ որոշ կետերում էլ բողոքում են բնակիչների պասիվությունից: «Ամեն մեկն իր ա ունեցած գումարի սահմաններում է ծաղիկ առնում: Կամ գալիս են մեկական վարդեր առնում, կամ ծաղիկներից հավաքված կոմպոզիցիաներ, ով էլ գումար ունի՝ ճոխ բուկետ է առնում»,- նշեցին ծաղկավաճառները:
Այսօր մարդաշատ էին նաեւ նվերների խանութները, սակայն ինչպես տեղեկացնում են խանութների աշխատակիցները, նախորդ տարիներին մարդկանց ձեռքին ավելի շատ գումար կար, եւ առեւտուրն էլ համեմատաբար ավելի լավ էր ընթանում:
Մերի ՍՈՂՈՄՈՆՅԱՆ
Կարդացեք նաև
