Այսօր առավոտյան ժամը 11-ից Արագածոտնի մարզի Օհանավանի, Ուշիի, Կարբիի եւ 4 այլ գյուղերի գյուղապետերն ու ակտիվիստ գյուղացիները, որոնք, երեկ փակել էին Ապարան-Երեւան ճանապարհը` բողոքելով իրենց գյուղերի մերձակայքում կառուցվող փոքր ՀԷԿ-ի դեմ, մարզպետի, մարզի եւ Աշտարակ քաղաքի ոստիկանապետերի հետ հանդիպել են ՀՀ ոստիկանապետ Վլադիմիր Գասպարյանին:
Aravot.am-ի հետ զրույցում ՀՀ ոստիկանության լրատվական ծառայությունից հաստատեցին, այս տեղեկությունը:
Մեր տեղեկություններով, հանդիպումը տեւել է շուրջ երեք ժամ, որին ներկա է եղել նաեւ ՀԷԿ-ի շինարարը:
Մեր հարցին, թե ինչո՞ւ հենց ոստիկանապետի հետ, երբ գյուղացիների բողոքը բնապահպանության նախարարության եւ այլ գերատեսչությունների դեմ է, լրատվական ծառայությունից հայտնեցին, որ ոստիկանապետը նրանց հրավիրել է` քննարկելու եւ քաղաքակիրթ ճանապարհով լուծելու հարցը, որպեսզի նրանց բողոքը տեղի չունենա հասարակական կարգի խախտմամբ` ինչպես որ երեկ էր` Ապարան-Երեւան ճանապարհը փակելով. «Չի կարելի նման ճանապարհը փակել, այն մի շարք բնակավայրեր տանող ճանապարհ է եւ այդ ճանապարհով շտապօգնության մեքենաներ էլ են երթեւեկում»:
Կարդացեք նաև
Թե ինչպես են գնահատում ոստիկանապետի հետ հանդիպումը գյուղապետերը, նրանցից որեւէ մեկի հետ չհաջողվեց կապվել: Աշխատանքային ժամին ո’չ Ուշիի, ո’չ Կարբիի, ո’չ Օհանավանի գյուղապետերը մեր հեռախոսազանգերին չէին պատասխանում: Հասանելի էր միայն Արտաշավանի գյուղապետ Ղազար Կարապետյանը, ով սակայն, հիվանդանոցում լինելու պատճառով ոստիկանապետի հետ հանդիպման չէր գնացել:
Նշենք, որ երեկ մոտ երեք ժամ Ապարան-Երեւան ավտոճանապարհին երթեւեկությունը կաթվածահար էր եղել: Ուշիի, Օհանավանի, Կարբիի, Արտաշավանի եւ այլ գյուղերի բնակիչները փակել էին ավտոճանապարհը` պահանջելով չեղյալ հայտարարել իրենց գյուղերին հարակից տարածքում փոքր ՀԷԿ կառուցելու որոշումը:
Լուսինե ԲՈՒԴԱՂՅԱՆ
