Գառնու տաճարի հարակից տարածքում սրճարան կառուցելու` ՀՀ մշակույթի նախարարության մտադրությունը լուրջ դժգոհության ալիք է բարձրացրել: Մտավորականների մի մեծ զանգված, համայնքի բնակիչները մտահոգված են, որ սրճարանի կառուցմամբ կվտանգվի տաճարի` որպես պատմամշակութային արժեքի պահպանությունը:
Մտավորականների մեծամասնությունը կարծում է, որ սրճարան կառուցելը, անգամ եթե նախարարությունը պատճառաբանում է, որ հասույթը ուղղվելու է տաճարի պահպանությանը, նախարարության գործառույթների մեջ չի մտնում:
Հրապարակախոս Կարինե Հակոբյանը հույս ունի, որ հաշվի առնելով լուրջ դժգոհությունների ալիքը, սրճարանը չի կառուցվի: Այս առիթով նա նշեց. «Ամոթ է, սրճարանը չպիտի կառուցվի, ինչի՞ համար է այսքան ժամանակ պայքարում մշակույթի նախարարությունը, տեսավ դիմադրությունը, պետք է դադարեցներ»:
Aravot.am-ը «Պատմամշակութային արգելոց-թանգարանների և պատմական միջավայրի պահպանության» ծառայություն ՊՈԱԿ-ի տնօրենի հասարակայնության հետ կապերի գծով օգնական Մարինե Ավանեսյանից հետաքրքրվեց` այս պահին գործընթացն ի՞նչ փուլում է: Նա պատասխանեց. «Հաշվի առնելով Գառնու տաճարի մերձակայքում սրճարան կառուցելու հետ կապված վերջին օրերին իրականացվող քննարկումներն ու հնչած մտահոգությունները` մեր ՊՈԱԿ-ը և մշակույթի նախարարությունը սկսել է հանդիպումների շարք` շահագրգիռ կողմերի հետ` Զբոսավարների միության, «Արորդիների ուխտ»-ի և այլ կազմակերպությունների: Առհասարակ մենք պատրաստ ենք բոլոր շահագրգիռ անձանց և կողմերի դիրքորոշումը լսել»:
Կարդացեք նաև
Մարինե Ավանեսյանը տեղեկացրեց, որ արդեն չորս օր է` Գառնու տաճարի մերձակայքում շինարարական աշխատանքներ չեն կատարվում, մինչև համապատասխան որոշում կայացվի»:
Հետաքրքրվեցինք` քննարկումները դեռ որքա՞ն կշարունակվեն: Մարինե Ավանեսյանը պատասխանեց. «Քննարկելու անհրաժեշտություն որքան լինի, այնքան էլ կքննարկեն»:
Մեր հարցին` մինչև այժմ եղած քննարկումները, հնչեցված մտահոգությունները բավարար չե՞ն հասկանալու, որ սրճարանի կառուցման հարցում լուրջ դիմադրություն կա, Մարինե Ավանեսյանն այսպես արձագանքեց. «Սա այն դեպքն է, որ եթե անհրաժեշտություն կա քննարկել ոչ թե մեկ օր, այլ մեկ շաբաթ, կամ ավելի, ապա ճիշտը դա անելն է»:
Տաթև ՀԱՐՈՒԹՅՈՒՆՅԱՆ
