Մարտի 7-ին մեկնարկեց «Ես ստորագրում եմ» խորագրով եռօրյա դասընթացը՝ նախատեսված ՀՀ տարբեր բուհերի «Ժուռնալիստիկա» մասնագիտությամբ 25 ուսանողների համար: Ծրագիրը կազմակերպել են «Երիտասարդ ժուռնալիստների ասոցիացիա» ՀԿ-ն և Հայաստանի երիտասարդական հիմնադրամը։
Դասընթացին մասնակցելու համար հայտ է ներկայացրել շուրջ 100 ուսանող, որոնցից ընտրվել են 25-ը։
«Երիտասարդ ժուռնալիստների ասոցիացիա» ՀԿ նախագահ, ԵՊՀ դասախոս Արման Ղազարյանը նկատեց, որ լրագրողական դաշտում կան խնդիրներ, որոնք դրական լուծման կարիք ունեն։ Այդ խնդիրներից Արման Ղազարյանն առանձնացրեց ժուռնալիստական պատասխանատվության հարցը։ «Առաջիկա 3 օրերի ընթացքում մենք կանդրադառնանք ժուռնալիստական պատասխանատվության տարբեր ոլորտներին և տարբեր տեսանկյուններից ՝ իրավական կարգավորման, ռազմական ոլորտի լուսաբանման և այլն։ Բայց այդ ամենն ի վերջո հանգում է մարդու անձնական պատասխանատվությանը»,- դասընթացի բացման խոսքում նշեց Արման Ղազարյանը։
ԵՊՀ ժուռնալիստիկայի ֆակուլտետի ուսանողուհի Սիրանույշ Բադալյանը նշում է, որ ժուռնալիստիկայի հողին ամուր կանգնելու համար նման դասընթացներն անհրաժեշտ են։ Նա նկատում է, որ բուհը և նման սեմինարները տալիս են հիմնական գիտելիքներ, և եթե ուսանողը մի փոքր խորագետ ու գրագետ լինի, կկարողանա դրանք կիրառել գործնականում։
Եռօրյա դասընթացի հիմնական թեմաներն են՝ «ԶԼՄ դերը ժողովրդավարական սոցիալ-քաղաքական համակարգում» (Արման Ղազարյան՝ «Երիտասարդ ժուռնալիստների ասոցիացիա» ՀԿ նախագահ), «Ժուռնալիստական պատասխանատվություն. անանուն նյութերի հրապարակումը լրատվամիջոցներում» (Դավիթ Ալավերդյան՝ «Մեդիամաքս» մեդիաընկերության գլխավոր խմբագիր), «ԶԼՄ գործունեության իրավական կարգավորումը» (Շուշան Դոյդոյան՝ Ինֆորմացիայի ազատության կենտրոնի նախագահ), «Հեղինակային իրավունքը ԶԼՄ-ներում» (Արփինե Հովհաննիսյան՝ ՀՀ ԱԺ պատգամավոր, իրավաբան), «Ռազմական ոլորտի լուսաբանման առանձնահատկությունները» (Դավիթ Ջամալյան՝ ՀՀ պաշտպանության նախարարի խորհրդական)։
Հայաստանի երիտասարդական հիմնադրամի
հասարակայնության հետ կապերի ծառայություն
