«Մարդիկ երեկ չէին հասկանում՝ ինչ շինարարություն է այնտեղ կատարվում, ինչ նպատակով է այն արվում եւ մտածում էին, որ շինարարության արդյունքում կզրկվեն ոռոգման ջրից»,-այսօր «Էկոլուր» մամուլի ակումբում այսպես վերլուծեց ԱԺ պատգամավոր Լյովա Խաչատրյանն այն փաստը, որ երեկ Ապարան-Երեւան ճանապարհը փակած գյուղացիները դեմ էին դուրս եկել Օհանավան գյուղի շրջակայքում կառուցվող ՀԷԿ-ի շինարարությանը:
Պատգամավորի կարծիքով՝ պրոբլեմը կայանում է նրանում, որ ժողովուրդը չի հասկանում, թե ինչ է տեղի ունենում. «Պաշտոնատար անձինք կանգնած հինգ րոպեյվա մեջ 8 բան էին ասում: Արագահոս ենք կառուցում, արագահոս չենք կառուցում: ՀԷԿ ենք կառուցում, ՀԷԿ չենք կառուցում՝ կարծես թե ծաղրում էին: Մարդիկ անտեղյակությունից էին բորբոքվել»:
Պրն Խաչատրյանի խոսքերով՝ արագահոսը, որը Ապարանի ջրամբարի ջուրը տանում է դեպի Արզնի-Շամիրամ ջրանցքը, վերանորոգվում է եւ դրա վրա կարելի է ՀԷԿ կառուցել. «Դա ոչնչին չի խանգարում: Մարդկանց բացատրեք: Մարդիկ ուրիշ մտավախություններ ունեն: Ոռոգման համակարգը ունի թերի տեղեր, մարդիկ ստիպված այդ արագահոսից են ջուր վերցնում, որպեսզի ոռոգեն այգիները : Դրանից ջուր վերցնելու իրավունք չկա: Սա ջուր տեղափոխելու համար է, բայց քանի որ համակարգը չի աշխատում, մարդիկ ստիպված դրանից են օգտվում»: Նրա կարծիքով՝ արագահոսի վրա դրված ՀԷԿ-ը չի կարող խանգարել գյուղացիներին:
Մանրամասն՝ տեսանյութում
Կարդացեք նաև
Լյովա Խաչատրյանն ասաց, որ ինքն այսօր առավոտյան հանդիպել է փոխվարչապետի հետ եւ քննարկել հարցը. «Փոխվարչապետը տեղյակ էր դրա մասին: Զրուցեցինք եւ եկանք այն եզրակացության, որ այսօր դեռեւս ՀԷԿ կառուցելու խնդիրը դրված չէ: Երբ ստանանք թույլտվություն, միայն դրանից հետո կսկսենք կառուցել»:
Սակայն պրն Խաչատրյանը նաեւ ասում է, որ արդեն կառուցելու համար նախատեսված բոլոր փաստաթղթերը եւ նախագծերը պատրաստ են:
Ասուլիսին ներկա «Համահայկական բնապահպանական ճակատ» քաղաքացիական նախաձեռնության անդամ Լեւոն Գալստյանն էլ ասաց, որ ՀԷԿ-ի կառուցումը օրենքով ամրագրված չէ. «Մենք եւս մեկ անգամ ականատես եղանք այն բանին, որ գործունեությունը կատարվում է առանց օրենքի:
Այսինքն, սկսվել է բավականին լուրջ շինարարական աշխատանք: Ըստ էության, եթե կառուցում են երկու մետր տրամագծով խողովակաշար, դա, միանշանակ, բնապահպանական փորձաքննության պետք է ենթարկել»:
Մանրամասն՝ տեսանյութում
Էլյա ՀՈՎՀԱՆՆԻՍՅԱՆ
