Քիչ առաջ ֆինանսների նախարարության մոտից ոստիկանները բերման էին ենթարկել «Դեմ ենք պարտադիրին» նախաձեռնության ղեկավարներին եւ անդամներին: Բերման են ենթարկել հենց փողոցի մեջտեղից, երբ ցուցարարները փակել էին փողոցը:
Բերման են ենթարկել բռնություններով: Ոստիկանների եւ ցուցարարների բախման արդյունքում ցուցարար տարեց մի կին տուժել է: Նրա պատմելով՝ ոստիկանը ոտքով խփել է վիրահատված որովայնին, վիրահատության կարերը քանդվել են: Ոստիկանները պարբերաբար հրելով ցուցարարներին, բացում են փողոցը, բայց ցուցարարները կրկին փակում են՝ ամոթանք տալով:
Երկարատեւ ժամանակ փողոցի երթեւեկությունը խախտվել է, ցուցարարները 10, 20 դրամանոցներ են նետում ոստիկանների վրա: Ֆինանսների նախարարության դիմաց ոստիկաններին են միացել կարմիր բերետավորները: Բախումը սկսվեց այն բանից հետո, երբ ցուցարարները պահանջում էին ներքեւ իջնի նախարարը եւ պարզաբանի, սակայն ներքեւ իջան ֆինանսների նախարարության աշխատակազմի ղեկավարն ու մեկ այլ աշխատակից ու ցուցարարներին առաջարկեցին պատվիրակություն կազմել եւ բարձրանալ ֆինանսների նախարարի հետ հանդիպման: Բայց ցուցարարները հրաժարվեցին եւ պահանջեցին, որ նախարարը իջնի: Իսկ աշխատակազմի ղեկավարը դժգոհելով, թե ցուցարարները պատրաստ չեն երկխոսության եւ ամբոխավարությամբ են զբաղված, հեռացավ:
Այս պահին ոստիկանական պատը ճեղքելով՝ տասնյակ ցուցարարներ դարձյալ մոտեցել են ֆինանսների նախարարությանը եւ իրենց մանրադրամներն են նետում նախարարության դռների մոտ:
Բողոքի ցույցին միանում են նորանոր կարմիր բերետավորներ՝ զինված մահակներով:
Արփինե ՍԻՄՈՆՅԱՆ
