Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանում «Արաբկիր» բժշկական կենտրոնի մանկաբույժներ Զարինե Այվազյանի եւ Լիլիթ Վարդանյանի դեմ հարուցված քրեական գործով վկայություն տվեց Գեորգի Միսակյանը: Նա դատարանին ներկայացրեց, թե ինչպես է իր երեխային՝ Լիա Միսակյանին տեղափոխել «Արաբկիր» ԲԿ: Երեխան ջերմել է, այդ իսկ պատճառով կանչել են շտապօգնություն: Շտապօգնության բժիշկը հայտնել է, որ երեխային պետք է անմիջապես տանեն հիվանդանոց եւ քանի որ «Արաբկիրում» եղել է ապահովագրություն, Գեորգի Միսակյանը նախընտրել է երեխային տեղափոխել այնտեղ:
Ըստ վկայի (նրա հարցաքննությունը ավարտվելուց հետո դատարանում հանդես կգա որպես տուժողի իրավահաջորդ)՝ երեխային առաջինը զննել է Լիլիթ Վարդանյանը եւ ասել է, որ թոքի հետ կապված խնդիր չկա: Երեխան դարձյալ ջերմել է, ըստ հոր պատմածի՝ «իր տեղը չէր գտնում» (աշխույժ երեխա է եղել): Ջերմությունը պարբերաբար չափել են իրենք, իսկ հաջորդ օրը՝ հունվարի 1-ին հերթապահել է Զարինե Այվազյանը:
Նա սիստեմա է նշանակել եւ երբ հայրն ասել է՝ պետք է կոկորդը մաքրել, նա պատասխանել է, որ սիստեման միացված է եւ դրա մեջ ամեն ինչ կա, անհոգ եղեք: Տեսնելով, որ հաջորդ օրն էլ երեխայի ջերմությունը չի իջնում, չի կարողանում շնչել, հայրը մոտեցել է կոկորդի բժշկուհուն՝ Իրինա Մամյանին: Երեխային անմիջապես տարել են ռենտգեն ստուգման: Բավական ուշացումով ասել են, որ երեխայի աջ կողմի թոքի թոքաբորբ է: Կոկորդի բժիշկն էլ կոկորդի վիճակը համարել էր ահավոր, ասել էր, որ մաքրել է պետք, հոգնա են արել թույլ լուծույթով: Հայրն ասաց, որ ողջ ժամանակ իր աչքի առջեւ է եղել երեխան, բերանից թարախի հոտ էր գալիս այն օրը, երբ տարել է բուժհաստատություն եւ որ այդ հոտը բավարար էր, որ առաջին իսկ օրը ստուգեին կոկորդը, մաքրեին այն: Գեորգի Միսակյանն ասաց, որ նախաքննության ժամանակ տված բացատրությունները ճիշտ են: Սկսվել է նրա հարցաքննությունը, նրան հարցաքննել է դատախազ Կարապետյանը եւ իր ներկայացուցիչ, իրավապաշտպան Արթուր Սաքունցը:
Հայտարարվել է կարճ ընդմիջում, ժամը 14-ին կշարունակվի դատական նիստը:
Կարդացեք նաև
Ռուզան ՄԻՆԱՍՅԱՆ
