Քիչ առաջ մետրոյի «Հանրապետության հրապարակ» կայարանի հարեւանությամբ 70-ին մոտ մի ծերունի՝ Նիկոլայ անունով, փորձեց հրկիզվել՝ իր վրա բենզին լցնելով: Ծերունին դժգոհում է, որ չեն վերադարձնում իր ավանդները: Ոստիկանները կանխեցին ինքնահրկիզումը եւ ծերունուն տարան ոստիկանության բաժանմունք:
Նույն վայրում տասնյակ ցուցարարներ «Դեմ ենք պարտադիրին» եւ «Ոչ կողոպուտին» կարգախոսներով բողոքի ակցիա են իրականացնում ընդդեմ կենսաթոշակային կուտակային համակարգի: Նրանք մեղադրում են նախարարներին, մասնավորապես՝ ֆինանսների նախարարին՝ պարտադիր կուտակային կենսաթոշակի մասին օրենքով դրամահավաք անցկացնելու մեջ: «Շտապ հարկավոր է բյուջե լցնել, բայց, հարգելի նախարարներ, ձեզ բարձր պահեք եւ դրամահավաք մի արեք»,- ասաց ակտիվիստներից մեկը: Ցուցարարներից մեկն էլ կարծիք հայտնեց, որ ֆինանսների նախարարությունը ծուղակի մեջ է գցել գործատուներին եւ այն գործատուները, որոնք իրենց աշխատակիցների աշխատավարձից արդեն պահումներ են կատարում, խորհուրդ են տալիս փոխանցել գանձապետարան, բայց փոխարենը չի ասում՝ հարցրեք ձեր աշխատակիցներին՝ համաձա՞յն են դրա հետ:
Այս պահին ակտիվիստները շարժվում են կառավարության շենք, իսկ ոստիկանները պատ կազմած փակել են ճանապարհը:
Ֆինանսների նախարարության դիմաց ակտիվիստների եւ ոստիկանության միջեւ բախում սկսվեց՝ քաշքշում, հրում են մի կողմ:
Կարդացեք նաև
Մանրամասները՝ քիչ հետո
Արփինե ՍԻՄՈՆՅԱՆ
