ՀԿԿ Վանաձորի քաղաքային կոմիտեի առաջին քարտուղար Անդրանիկ Ղուկասյանը կարծում է, որ Ուկրաինայում ծավալվող դեպքերը նպատակ են հետապնդում երկրին հետ պահելու Մաքսային միություն մտնելուց:
«Ուկրաինան հերթական զոհն է գերտերությունների շահերի բախումների խաչմերուկում»,-այդ մասին Aravot.am-ի հետ հարցազրույցում ասաց ՀԿԿ կենտրոնական կոմիտեի քարտուղար, ՀԿԿ Վանաձորի քաղաքային կոմիտեի առաջին քարտուղար Անդրանիկ Ղուկասյանը:
Նա նշեց, որ այն, ինչ կատարվեց Ուկրաինայում, ԱՄՆ-ի ագրեսիվ քաղաքականությունն է` աշխարհին տիրելու համար:
«Պատճառն այն էր, որ Ուկրաինայի` Մաքսային միություն մտնելը ձեռնտու չէր ոչ Եվրոպային, ոչ ԱՄՆ-ին, որովհետեւ Ուկրաինան Եվրոպայի քարտեզում նշանակալից տարածք է գրավում, եւ այնպիսի գործընթացներ կատարվեցին, որպեսզի ապակայունացնեն Ուկրաինայի վիճակը»:
Կարդացեք նաև
Անդրանիկ Ղուկասյանը նշում է, որ ԱՄՆ-ը նույնկերպ ապակայունացում է ստեղծել աշխարհի տարբեր երկրներում` Եգիպտոս, Սիրիա, Թունիս, Իրաք, Լիբիա:
«Փորձ արեցին Իրանի դեմ, բայց Ռուսաստանը չթողեց, հերթը Ուկրաինան էր, հետո գալու էր Բելառուսը, Ռուսաստանը: Ուկրաինան հերթական զոհն է` գերտերությունների շահերի բախումների խաչմերուկում: Ոչ Եվրոպան, ոչ էլ ԱՄՆ-ն չեն ցանկանա, որպեսզի Ուկրաինան լինի հզոր, եւ իր հզորությամբ միանա Ռուսաստանին, Մաքսային միությանը»:
Անուշ ԲՈՒԼՂԱԴԱՐՅԱՆ
