Շախմատի Եվրոպայի տղամարդկանց անհատական առաջնությունում երկու տուրից հետո 100 տոկոսանոց արդյունք ցույց տված հայաստանցի չորս շախմատիստներից մեկը գրոսմայստեր, 47-ամյա վետերան Արտաշես Մինասյանն է:
Aravot.am-ի խնդրանքով գրոսմայստեր Արսեն Եղիազարյանը խոսեց Հայաստանի հավաքականում իր երբեմնի թիմակիցներ Արտաշես Մինասյանի եւ հայկական շախմատի կենդանի լեգենդ` 63-ամյա Ռաֆայել Վահանյանի (նա երկու տուրում վաստակել է 1,0 միավոր) խաղի մասին:
«Իհարկե, շատ դժվար է երկար ժամանակ մրցաշարերի չմասնակցելու պարագայում խաղալ գործող գրոսմայստերների հետ, այն էլ նրանց, ովքեր, փաստորեն, ձեւավորում են ժամանակակից եվրոպական շախմատի վերնախավը: Եվ այն, որ Արտաշեսն ունի երկու, իսկ Ռաֆայելը` մեկ միավոր, ցույց է տալիս, թե նրանց խաղամակարդակը որքան բարձր է: Արտաշես Մինասյանը, ինչպես գիտեք, ԽՍՀՄ վերջին չեմպիոնն է, իսկ Ռաֆայել Վահանյանին շախմատային աշխարհին ներկայացնելու հարկ չկա:
Կարդացեք նաև
Եթե այս առաջնությունում նրանց խաղն ստացվի, կարծում եմ, որ երկուսն էլ կարող են տեղ զբաղեցնել 23 լավագույնների մեջ եւ Աշխարհի գավաթի խաղարկությունում հանդես գալու իրավունք նվաճել: Թեեւ, Հայաստանի ներկայացուցիչները, եթե ուղեգիր նվաճեն, դժվար թե մասնակցեն, քանի որ Աշխարհի գավաթը կայանալու է Բաքվում», – ասաց մեր զրուցակիցը:
Աշոտ ՀԱԿՈԲՅԱՆ
