Առողջապահության նախարարության մայրության եւ վերարտադրության բաժնի պետ Գայանե Ավագյանն այսօր «Պոստ Սկրիպտում» մամուլի ակումբում ներկայացնում էր Հայաստանում կանանց առողջության վերաբերյալ խնդիրները:
Նրա պնդմամբ, վերջին տարիներին մեծացել է կանանց եւ երեխաների առողջության պահպանմանն ուղղված նպատակային ծրագրերի քանակը. «Կարեւորելով պոտենցիալ մայրերի առողջությունը՝ Հայաստանը եզակի երկրներից է, որտեղ իրականացվում է 15 տարեկան աղջիկների համալիր հետազոտություն, առողջական վիճակի գնահատում, շեղումների, ախտաբանությունների վաղ հայտնաբերում եւ վերացում: Այսինքն, մենք այդ աղջիկներին պատրաստում ենք առողջ մայրության»:
Տիկին Ավագյանի խոսքերով, այս ծրագիրը 15 տարեկան տղաների վրա նույնպես տարածվում է. «Մենք գիտակցում ենք, որ առանց առողջ տղամարդու հնարավոր չէ ունենալ առողջ ընտանիք: Հետեւաբար, աղջիկների ստուգման ծրագրին զուգահեռ, 15 տարեկան տղաների շրջանում, նույնպես, կատարվում է զանգվածային ուսումնասիրություն»:
Գայանե Ավագյանը վստահեցնում է, որ այս քայլը ուղղված է անպտղության հաճախականության իջեցմանը Հայաստանում:
Կարդացեք նաև
Նրա խոսքերով՝ Հայաստանում 3 անգամ կատարվել են լայնածավալ հետազոտություններ՝ հայտնաբերելու համար անպտղության հաճախականությունը կանանց եւ տղամարդկանց շրջանում: «Եթե 90-ական թվականներին այն եղել 24 տոկոս, 2000 թվականին անպտղության հաճախականությունը դարձավ աննախադեպ բարձր՝ 31,8 տոկոս»:
Մշակվեցին մի շարք միջոցառումներ՝ անպտղության հաճախականությունը նվազեցնելու համար. «Այն կանխելու համար՝միջոցառումներ ձեռնարկեցինք՝ ընդդեմ հղիության արհեստական ընդհատումների, բարձրացվեց կանանց տեղեկացվածությունը ժամանակակից հակաբեղմնավորիչ միջոցների նկատմամբ: Կարեւոր քայլեր ձեռնարկվեցին անվտանգ սեռական վարքագծի ձեւավորման համար: Շնորհիվ այս ամենի, 2010 թվականին անպտղությունը կազմում էր 16,8 տոկոս է՝ այսինքն կրկնակի նվազել է» :
Համաձայն տիկին Ավագյանի նշած տվյալների՝ Հայաստանում նվազել է նաեւ հղիության արհեստական ընդհատման քանակը. «Եթե մի քանի տարի առաջ 1 ծննդին բաժին էր հասնում 1 արհեստական ընդհատում, ապա ընդհատման քանակը բավականին նվազել է, եւ ներկայումս 6 ծննդին բաժին է հասնում 1 արհեստական ընդհատում»:
Էլյա ՀՈՎՀԱՆՆԻՍՅԱՆ
