«Անտարես» հոլդինգի նախագահ Արմեն Մարտիրոսյանն այսօր «Հայելի» ակումբում խոսեց այն թեմայով, թե ինչ ազդեցություն կունենա Մաքսային միության անդամակցելը Հայաստանի հրատարակչական գործի վրա:
Պարոն Մարտիրոսյանի խոսքով՝ մաքսատուրքի վրա կավելանա նաեւ ավելացված արժեքի հարկը, ու մեզ սպասվում են անասելի թանկացումներ, եթե Հայաստանի բանակցողները չկարողանան ինչ-ինչ փաստարկներ բերել՝ ի պաշտպանություն հայատառ գրքի: «Ես փորձել եմ տարբեր պետական ատյանների միջոցով հասնել նրան, որ պահեն հայատառ գրքի շահը, սակայն ստացել եմ պատասխան, թե նամակ գրեք, ժամանակ չունենք եւ այլն»,-ասաց Արմեն Մարտիրոսյանը՝ լրագրողներին կոչ անելով հրատարակիչների պահանջը հասցնել հասցեատերերին:
«Ինչ վերաբերում է ռուսական թղթին, այն միայն անունով է թուղթ, եւ ոչ մի իրեն հարգող պոլիգրաֆիստ չի տպագրի ռուսական թղթի վրա: Ռուսական եւ եվրոպական թուղթը իրարից տարբերվում են այնքանով, որքան «Ժիգուլին» «Բենթլիից»,-հայտարարում է «Անտարեսի» նախագահը: Նաեւ հավելում է, որ
մինչ այժմ ներմուծված որակյալ տպագրական թուղթը եվրոպական ծագում ունի, ու այն արդեն թանկացել է՝ եվրոյի՝ դրամի հանդեպ թանկացման պատճառով, ավելացված արժեքի հարկն ու մաքսատուրքերն էլ, որ գումարվեն, ծնողները կդժվարանան վճարել դասագրքերի համար: Նրա խոսքով, բացի թղթից, կթանկանա
Կարդացեք նաև
ներկը, հեղուկները, ինքնարժեքը կբարձրանա, գները կաճեն, իսկ գրքի հիմնական սպառողները սոցիալական ծանր վիճակում են գտնվում: Բանախոսի ասելով, այս համատեքստում Հայաստանում հայերեն կրթություն ստանալու իրավունքը կթանկանա, կարճ ասած՝ հայատառ գրքի տպագրումը ՄՄ-ի պարագայում վտանգի տակ է: Նրա համոզմամբ, դա կարող են կանխել, եթե ռուսներին համոզեն, որ այդ մաքսատուրքերը, որ կկիրառվեն տպագիր հայատառ գրքի նկատմամբ, խախտում են մեր Սահմանադրությունը:
Արմեն Մարտիրոսյանի հաշվարկով, տպագիր ԶԼՄ-ներն էլ ստիպված են թանկացնել իրենց արտադրանքը, քանի որ Ռուսաստանը թեկուզ վատ որակի, բայց լրագրային թուղթ արտադրող երկիր է:
Պատասխանելով «Ա1+»-ի հարցին, որ եթե Լեւոն Խեչոյանի 4500 դրամանոց գիրքը տպագրվեր մյուս տարի, որքա՞ն կարժենար թանկացումների արդյունքում, Արմեն Մարտիրոսյանը նշեց. «Այդ դեպքում Լեւոն Խեչոյանի գիրքը կտպագրվեր 6200 դրամով, բայց նկատենք, որ Լեւոն Խեչոյանի գիրքը ազատ շուկայի գիրք է, այն կարող են ոմանք չգնել, իսկ դասագրքերը պարտադիր են»:
Պարոն Մարտիրոսյանը հավելեց, որ խնդրով մտահոգ հրատարակիչները կապվել են մշակույթի եւ ԿԳ նախարարությունների հետ, սակայն հարցը առայժմ առկախ է, տեղյակ են, որ ռուսների հետ Հայաստանի բանակցողներն էլ ֆինանսների եւ էկոնոմիկայի փոխնախարարներն են: Ասում է՝ հրատարակիչները կարող են բանակցողներին իրենց գիտելիքը փոխանցել:
Բանախոսը գտնում է, որ ռուսերենը մեծ լեզու չէ եւ միայն այդ տիրույթում եղած գիտելիքով սահմանափակվելը անմտություն է. «Մեծ լեզուները անգլերենը, չինարենը, իսպաներենն են… Ցավոք, ռուսական գրականությունը էապես զիջում է իսպանալեզու գրականությանը: Ու, ցավոք, մենք ռուսական գրականության մասին ավելի շատ գիտենք, քան, ասենք, կոլումբիականի, արգենտինականի ու չիլիականի»:
Նրա խոսքով, մեր ոչ մի տեսակի արտադրանքը ռուսական շուկայում եղանակ չի փոխում, անգամ պահածո արտադրողները չեն կարող ապրանք հանել ռուսական շուկա, որովհետեւ նրանց ողջ տարվա արտադրանքը ռուսները ցանկանում են մեկ օրվա համար, իսկ ոչ մի ռուսական ընկերություն չի ցանկանա մեկ օրվա համար բանակցել:
Արմեն Մարտիրոսյանը վկայակոչելով ՀՀ վարչապետի այն միտքը, թե Հայաստանը եվրոպական երկրների հետ ունի բարենպաստ ռեժիմ եւ կարող է դրանից օգտվել, ասաց. «Այո, ես կարող եմ օգտվել, եթե գազ ու նավթ վաճառեմ կամ անտառ, գազ ու նավթ չունենք, անտառն էլ պետք է երկաթգծով վաճառես, հո ինքնաթիռով չես վաճառի: Կասպերսկի անտիվիրուսը եւս հաճույքով կվաճառեինք Եվրոպայում, բայց Կասպերսկին վաղուց դա արել է»:
Ասուլիսի ժամանակ անդրադարձ եղավ նաեւ ՀԴՄ-ների պարտադրանքին: «Անտարես» հոլդինգի նախագահը նշեց, որ այժմ էլ ուզում են 150 հազար դրամով ՀԴՄ սարքերը վաճառել գյուղի խանութների վրա. «ՀԴՄ-ն գյուղում գործ չունի անելու, քանի որ գյուղում դրամ չկա, կան միայն «նիսիայի» ցուցակներ: Հետեւաբար այն մարդկանց, ովքեր փոքր բիզնեսը քայքայող, ոչնչացնող ծրագիրը համառորեն տանում են առաջ, խորհուրդ կտայի, որ հրաժարվեն այս մտքից ու գյուղերին բաժանեն տետրեր կամ բլոկնոտներ՝ «նիսիայի» ցուցակներ գրի առնելու համար: Ի դեպ, այսօր ՊԵԿ-ի ՀԴՄ-ներ սպասարկող ձեռնարկությունը խախտում է կառավարության որոշումը՝ MS-ի փոխարեն կիրառելով MF սարքեր: Մի անգամ նույնիսկ խոսք գնաց, թե մի տառի տարբերություն է, ի՞նչ կլինի որ… Եղբայր, մի տառի տարբերություն է, բայց երբ Արսենի կինը մտնում է Արմենի ծոցը, դա արդեն ողբերգություն է»:
Գոհար ՀԱԿՈԲՅԱՆ
