Քիչ առաջ ավարտվեց «գազի հանձնաժողովի» նիստը, որին մասնակցում էին հանձնաժողովի բոլոր տաս անդամները: Հիշեցնենք, ԱԺ որոշման համաձայն հանձնաժողովում ՀՀԿ-ն ունի չորս անդամ, ԲՀԿ-ն երեք, մյուս խմբակցությունները ներկայացված են մեկական անդամով:
Հանձնաժողովի նախագահ Դավիթ Հարությունյան ի պատասխան Aravot.am-ի հարցի, տեղեկացրեց, որ այս նիստում քննարկվել են աշխատանքային-կազմակերպական բնույթի հարցեր:
Ըստ այդմ, հանձնաժողովը կունենա չորս աշխատանքային խումբ: ԱԺ-ի որոշմամբ նախատեսված հարցերը, որոնք պետք է քններ հանձնաժողովը, ևս բաժանվել են չորս մասի: Համապատասխանաբար, յուրաքանչյուր ենթախումբը կզբաղվի իր բաժին հարցերով, ապա, արդյունքներն ի մի կբերվեն`վերջնական եզրակացության համար: Բայց այն պատգամավորները, ովքեր կոնկրետ աշխատանքային ենթախմբից բացի կցանկանան մասնակցել նաեւ մյուս խմբերի աշխատանքներին, որեւէ արգելքի չեն հանդիպի: Ի դեպ, հանձնաժողովի աշխատանքներին ևս կարող են մասնակցել այլ պատգամավորներ, ովքեր ընդգրկված չեն հանձնաժողովի կազմում: «Աշխատանքները շարունակելու համար սա առավել հարմար ձեւ համարեցինք»,- ասաց Դավիթ Հարությունյանը`հավելելով, որ բաժանումը կատարվել է ըստ պատգամավորների նախասիրությունների:
Առաջին խումբը զբաղվելու է ջերմատվության, կալորիականության հարցերով, երկրորդը`կուտակված պարտքի օրինականության, երրորդը`բնական գազի տարանցիկության, չորրորդը`գազի սակագնի ձեւավորման հարցերով:
Կարդացեք նաև
ՀԱԿ պատգամավոր Արամ Մանուկյանն էլ տեղեկացրեց, որ հանձնաժողովի անդամներին առավելապես հետաքրքրել են հատկապես սակագնի ձեւավորման հարցը եւ գազի կալորիականության, ներտնային սպասարկման, կորուստների հիմնավորվածության խնդիրները:
Ինքը`Արամ Մանուկյանը, սակագնի ձեւավորման հարցերն ուսումնասիրող ենթախմբում է ընդգրկված, քանի որ վերջին շրջանում բավականին խորացել է այդ հարցերում: Այսօր, սակագնի ենթախումբն արդեն կհստակեցնի ի հետագա աշխատանքային պլանը`հանդիպումները եւ քննարկվող հարցերի շրջանակը:
Քանի որ աշխատանքներ դեռ կազմակերպական փուլում են առայժմ նիստերի գումարման գրաֆիկ մշակված չէ:
Aravot.am-ի հարցին`նախնական ի՞նչ տպավորություններ ունի հանձնաժողովի աշխատանքների տրամադրվածության վերաբերյալ, Արամ Մանուկյանն ասաց. «Իմ նախնական տպավորությունն է, որ հանձնաժողովն ուզում է աշխատել եւ ձգձգելու մոտիվ էլ չկա: Հետո`կտեսնենք»:
Նելլի ԳՐԻԳՈՐՅԱՆ
Անհրաժեշտ է նաեվ, որ հանձնաժողովը պատասխան տա, թե ինչով է հիմնավորված, որ տարբեր սակագներ են հաստատված շարքային քաղքացիների ու հարուստների համար: Սահմնադրությամբ այդպիսի բաժանում ՀՀ քաղքացիների համար չի նախատեսված: Ինչու պետք է հատկապես օլիգարխների կողմից ծախսվող մեծաքանակ գազի արժեքի մի մաս տա հասարակ ժողովուրդը…Արամ Մանուկյանը, քանի որ լավ է ուսումնասիրել, խորացել գազի հարցերում, թող բացատրի այդ երեվույթը…
Միաժամանակ ստուգեք նաև գազի հաշվիչների վիճակը: