Արաբկիր Քանաքեռ-Զեյթուն վարչական շրջանների դատարանում Armenia Today կայքի համակարգող Արգիշտի Կիվիրյանի գործով այսօր բացի ոստիկան Վահան Վրթանեսյանից հարցաքննվել են եւս երկու ոստիկան՝ Սարգիս Սարգսյանը:
Սարգիս Սարգսյանն ցուցմունք տալիս մի քանի հակասական տվյալներ ներկայացրեց: Որպես վկա ներգրավված Սարգսյանը նախ պատմեց, որ ինքն էլ է գտնվել ոստիկանական մեքենայում, երբ Կիվիրյանին բերման էին ենթարկում: Նա նախ ասաց, որ Կիվիրյանը մեքենայում կիսապառկած վիճակում է եղել, և ինքը չի տեսել , թե Կիվիրյանի ոտքերը որտեղ են եղել, հետո հակասեց իր ասածին՝ պնդելով, որ Կիվիրյանը ոտքերով հարվածել է իր նստատեղին:
Վկաների հարցաքննությունից հետո նիստը հետաձգվեց, հաջորդ նիստը տեղի կունենա մարտի 18-ին:
Արգիշտի Կիվիրյանի փաստաբան Լուսինե Սահակյանը նիստից հետո լրագրողների հետ զրույցում վստահեցրեց, որ ոստիկանների հակասական ցուցմունքները վկայում են սուտ ցուցմունքի մասին. «Ոստիկանները չեն նկարագրում այն, ինչ եղել է: Սկզբում, երբ պարզապես իրենց տեսածն էին պատմում, կրկնում էին իրար: Հետո, երբ հարցեր էինք տալիս մանրամասների մասին, իրար հակասում էին: Այս ցուցմունքների կարևորությունը կզգացվի այն ժամանակ, երբ կհրապարակվեն գործի նյութերը և կերևա, թե ինչ հակասական են եղել դրանք: Մեզ համար կարևոր էլ չէր, թե ինչ ցուցմունք կտային: Մենք ունենք ապացույցներ, որ ոստիկանությունն այդ օրը գործել է ապօրինի:
Կարդացեք նաև
Հիշեցնենք, որ օգոստոսի 24-ին Կոմիտաս 5 հասցեում կառուցվող շինության դեմ պայքարին հարակից շենքերի բնակիչներին էր միացել նաեւ Արգիշտի Կիվիրյանը: Ում այդ օրը բերման էին ենթարկել ոստիկանություն եւ ըստ պարոն Կիվիրյանի, ոստիկանության բաժանմունքի ճանապարհին իր նկատմամբ ոստիկանները բռնություն են կիրառել: Այդ մասին Կիվիրյանը հանցագործության մասին հաղորդում էր տվել, ինչը կարճվել էր , փոխարենը Կիվիրյանի դեմ էր քրեական գործ հարուցվել՝ ոստիկանի տված հաղորդման հիման վրա:
Արփինե ՍԻՄՈՆՅԱՆ
