Ռուսաստանը չի դիտարկում Ղրիմն իրեն միացնելու հարցը, հայտնել է Ռուսաստանի նախագահ Վլադիմիր Պուտինը «Ռոսիա 24» հեռուստակայանով մարտի 4-ին հեռարձակված մամուլի ասուլիսի ժամանակ:
Պուտինի խոսքերով, միայն երկրի քաղաքացիները խոսքի ազատության և անվտանգության պայմաններում կարող են որոշել իրենց ապագան, և իրենք ոչ մի դեպքում անջատողական տրամադրություններ ստեղծելու սադրանքների չեն դիմի, սակայն, ավելացրել է նա, «եթե դա թույլատրվել է անել Կոսովոյի ալբանացիներին, եթե դա թույլատրվել է անել աշխարհի տարբեր ծայրերում, ապա ազգի ինքնորոշման իրավունքը, որն ամրագրված է համապատասխան փաստաթղթերում, ոչ ոք չի փոխել»:
Խոսելով Ղրիմ զորք մտցնելու մասին՝ Պուտինը նշել է, որ դրա կարիքն այս պահին չկա, սակայն չի ժխտել դրա հնարավորությունը:
Ռուսաստանի նախագահը Ուկրաինայի իշխանափոխությունը որակել է հակասահմանադրական հեղաշրջում և կոչ արել սահմանադրության հանրաքվե անցկացնել.
Կարդացեք նաև
«Մեծ հաշվով, պետք է հանրաքվեի միջոցով նոր սահմանադրություն ընդունել, որպեսզի Ուկրաինայի բոլոր քաղաքացիները զգան, որ իրենք մասնակցում են այդ գործընթացին, ազդում են իրենց պետության հիմնական կառույցների ձևավորմանը», – ասել է Պուտինը՝ ավելացնելով, որ Ուկրաինայի միակ լեգիտիմ ղեկավարը Վիկտոր Յանուկովիչն է:
Պատրաստեց Հովհաննես ԻՇԽԱՆՅԱՆԸ
