Քիչ առաջ Ազատության հրապարակում սկսվեց ՀԱԿ հանրահավաքը: ՀԱԿ խմբակցության քարտուղար Արամ Մանուկյանի խոսքով.
«Վեց տարի է անցել այն օրից, երբ պետական խուժանը հարձակվեց հրապարկում խաղաղ ցույց անող ժողովրդի վրա, գնդակահարվեցին քաղաքացիներ, հաշմանդամ դարձան շատերը, առնվազն տասը զոհ ունեցանք: Մինչեւ հիմա հայ ժողովուրդը կրում է այդ վնասները, պատմական հանցագործության վնասներն է կրում: Անմեղ արյուն հեղվեց, երիտասարդներ զոհվեցին, բայց անտեղի արյուն չէր, բոլոր զոհերը խաղաղության, ժողովրդավարության, արժանապատվության ճանապարհին են զոհվել»:
Պարոն Մանուկյանը կարդաց «Մարտի մեկին» վեց զոհվածների անունները, ապա մեկ րոպե լռտությամբ հավաքվածները հարգեցին նրանց հիշատակը:
Հետո Մարտի մեկի զոհ Սամվել Հարությունյանի հայրը՝ ազատամարտիկ Էդիկ Հարությունյանը շարունակեց. «Այսօրվա իշխանությունները մեր ժողովրդի եւ իրենց մեջ թշնամություն են ստեղծել, իրենց պահվածքով վիրավորում են մեր ժողովրդին»:
Կարդացեք նաև
Պարոն Հարությունյանը նաեւ հավելեց. «Մեր հետագա պայքարը մեր միասնության մեջ է, մեզ հաղթել չի լինի, մենք բոլորին կհաղթենք»:
Պարոն Մանուկյանն էլ շարունակեց. « Մարտի մեկի ոճրագործության բացահայտումը միայն իրավական խնդիր չէ, դատավորների խնդիր չէ, բոլորիս արժանապատվության խնդիրն է: Կամ հասնում ենք նրան, որ հանցագործությունը բացայհայտվում է կամ մենք ազգ չենք. Կամ հայ ժողովուրդը բացահայտման հարցում պահանջատեր է ու իշխանություններին ստիպում է բացահայտել, կամ ազատվում է այս իշխանություններից, որոնք պարտակում են «մարտի մեկի» սպանդը:
Մենք հասնելու ենք բացահայտմանը, երբ էլ լինի, ոնց էլ լինի, սա հայ ժողովրդի հավաքական պատվի հարցն է»:
Հավաքվածներից մեկն էլ հակադարձեց, թե Հոկտեմբերի 27 – ի դեպքերն էլ չբացահայտվեցին, ուրեմն «Մարտի մեկն» էլ չի բացահայտվի, Արամ Մանուկյանն էլ կրկնեց հասնելու են նրան, որ բոլոր դեպքերն էլ բացահայտվելու են:
Արփինե ՍԻՄՈՆՅԱՆ
