Օրերս ՀՀ ոստիկանապետ Վլադիմիր Գասպարյանը հրահանգել է բացել Սայաթ-Նովա 23 եւ 25 շենքերի սեփականաշնորհված շքամուտքը, որը սեփականացնելուց հետո շքամուտքի տերը վարձակալությամբ էր տալիս:
Պարոն Գասպարյանին բնակիչները բողոքել են, որ տասը տարուց ավելի չեն կարողանում օգտվել իրենց սեփականաշնորհված մուտքից, եւ որ բոլոր կառույցներին՝ քաղաքապետարան, քաղաքաշինության նախարարություն, դատարաններ, բողոքներ են ներկայացրել, սակայն խնդիրը ոչ մի կերպ չի լուծվել ու չի լուծվել:
«Առավոտ»-ն իր 06.02.2014 թվականի «Տարոն Մարգարյանի խոստումն ընդամենը 5 օր է ուժի մեջ եղել» հրապարակմամբ անդրադարձել էր Սայաթ-Նովայի բնակիչների բողոքին: Բնակիչները մեզ հետ զրույցում անհանգստություն էին հայտնել, որ իրենց պատկանող շքամուտքը սեփականացրել են՝ քիչ չէ, մի բան էլ վարձով են տալիս՝ անտեսելով, որ բազմաբնակարան շենքերի մուտքերը օրենքով շենքի բնակիչների սեփականությունն են համարվում եւ որեւէ մեկը չի կարող դա միայնակ տնօրինել, սակայն ամսական 2500 դոլարով վարձով տրվող այս մուտքը տնօրինում է շենքի հետ ոչ մի կապ չունեցող ոմն Սուրեն Աղաբեկյան:
Ի պատասխան բնակիչների բողոքներին՝ Երեւանի քաղաքապետարանը, որի իրավասությունն է այս խնդիրը լուծելը, պատասխանել էր, որ կառույցն օրինական է, եւ ոչինչ չեն կարող անել:
Կարդացեք նաև
Բնակիչներից մեկի՝ Արամայիս Մկրտչյանի խոսքերով՝ «Իսկական ոստիկանը պաշտպանեց ժողովրդի շահերը»՝ նկատի ունենալով Վ. Գասպարյանի արարքը: Ա. Մկրտչյանը պատմեց, որ Վ. Գասպարյանը, անցնելով Աայաթ-Նովա փողոցով, բնակիչների հետ զրույցի է բռնվել եւ իմանալով նրանց խնդրի մասին՝ անմիջապես կարգադրել է բացել:
ԱՆՈՒՇ ՄԱԹԵՎՈՍՅԱՆ
«Առավոտ» օրաթերթ
