«Այն երկրում, որտեղ համախառն ներքին արդյունքի մեկ երրորդը կախված է արտագաղթից, ապա իշխանությանը ձեռնտու պետք է լինի արտագաղթը»,-այսպիսի կարծիք է հայտնում ազգագրագետ Հրանուշ Խառատյանը: Շարքային քաղաքացու համար էլ է ակնհայտ այն փաստը, որ տրանսվերտներն ու դրսից եկող մյուս միջոցները ՀՀ պետական բյուջեն լցնելու հարուստ աղբյուր են:
Արտագաղթի տեմպերի աճի մասին վկայում է նաև վիճակագրությունը: Այն, որ ՀՀ-ում մշտական բնակություն հաստատող անձանց թիվը տարեցտարի նվազում է, սա փաստում են նաև Ազգային վիճակագրական ծառայության ներկայացրած թվային տվյալները: Օրինակ`2014-ի հունվարի 1-ի դրությամբ` ՀՀ-ում մշտական բնակություն է հաստատել 3 միլիոն 17 հազար 400 մարդ: Սա նախորդ տարվա նույն ժամանակահատվածի համեմատ 9500 մարդով պակաս է: 2013-ի հունվարի 1-ին ՀՀ մշտական բնակչության թիվը կազմել է 3 միլիոն 26 հազար 900 մարդ:
Aravot.am-ի հետ զրույցում ԳԱԱ Փիլիսոփայության, սոցիոլոգիայի եւ իրավունքի ինստիտուտի տնօրեն, սոց. գիտ. դոկտոր, պրոֆեսոր Գևորգ Պողոսյանը ևս անդրադարձավ այս խնդրահարույց հարցին և ընդունեց այն հանգամանքը, որ արտագաղթի պարագայում մեր երկիր հսկայական գումարներ են մուտք գործում: Նա համադրեց այն փաստերը, որ մեր բնակչության մեկ երրորդից ավելին աշխատում է դրսում և այն, որ երկու միլիարդ դոլարի չափով փոխանցումներ են լինում դեպի Հայաստան` ՀՀ մեր միգրանտներից իրենց ընտանիքներին: Այնուհետև պարոն Պողոսյանը նշեց. «Այս երկու փաստերի համադրման դեպքում չնայած արտագաղթը մեծ վնաս է հասցնում մեր տնտեսությանը, քանի որ ակտիվ մասն է արտագաղթել, բայց զուտ նեղ ֆինանսական առումով այն գումարները, որ դրսից ստանում ենք, մեղմում է սոցիալական լարվածությունը ՀՀ-ում: Այս առումով դա ձեռնտու է իշխանություններին: Այդ երկու միլիարդ դոլարի չափով փոխանցումերը մեր բյուջեի կեսի չափ են ու եթե չլինեին, այդ դեպքում իրավիճակն ավելի պայթյունավտանգ կլիներ և ավելի սուր կլիներ սոցիալական տնտեսական իրավիճակը»:
Բայց այս իրավիճակում պարոն Պողոսյանը լուրջ վտանգներ է տեսնում ու նշում. «Բոլոր դեպքերում հասարակությունը սկսում է թուլանալ: Փորձը ցույց է տալիս, որ արտագաղթածները մի որոշ ժամանակ հետո գումար չեն ուղարկում, այլ իրենց ընտանիքի անդամներին են տանում Հայաստանից: Սա մեծ կորուստ է Հայաստանի համար, այն վտանգում է նաև ՀՀ անվտանգությունը»:
Կարդացեք նաև
Տաթև ՀԱՐՈՒԹՅՈՒՆՅԱՆ
