Մարտի 1-ը ՄԻԱՎ-ով ապրող մարդկանց նկատմամբ զրո խտրականության դրսևորման միջազգային օրն է: Օրվան ընդառաջ, Վորլդ Վիժն Հայաստան կազմակերպությունը գործընկերների հետ նախաձեռնել է հանրային միջոցառումների շարք, որոնք վերաբերում են ՄԻԱՎ/ՁԻԱՀ խնդիրներին և ՄԻԱՎ-ի վերաբերյալ հետազոտության խրախուսմանը: «Հենարան» մամուլի ակումբի հյուրերը՝ «Վորլդ Վիժնի» ներկայացուցիչներ Ինա Յանկուլովան, Շաղիկ Մարուխյանը և Անուշ Սահակյանը անդրադարձան մի շարք խնդիրների:
«Այն հետազոտությունները, որոնք արել ենք, հիմնականում միգրանտ աշխատողների հետ ենք արել: Այս միջոցառման համար տրամադրվել է շուրջ 970 մլն եվրո, որը տրամադրել է Եվրոմիությունը: ՄԻԱՎ-ի տարածումը ավելի շատ հայտնաբերվել է միգրանտների շրջանում: Վերջին շրջանում ակտիվ աշխատանքներ են տարվել ինչպես Հայաստանում, այնպես էլ Գավառի տարածքում: Եվ այդ միջոցառումների շնորհիվ երիտասարդների ուշադրությունն ենք գրավել այս խնդրի շուրջ»,-ասաց Ինա Յանկուլովան:
Անուշ Սահակյանը խոսեց միջոցառումների անցկացման և նպատակների մասին. «Ծրագիրն իրականացվում է Ռուսաստանում և Հարավային Կովկասի երկրներում: Նպատակն է պարզել ՄԻԱՎ-ի զարգացումն ու տարածումը միգրանտների շրջանակներում: Սա սովորական հիվանդությունների նման չէ, այն հնարավոր է լինում պարզել 8-10 տարվա ընթացքում և միակ հնարավորությունը՝ իմանալ մարդ հիվա՞նդ է, թե՞ ոչ, ինչքան հնարավոր է շուտ հետազոտություն անցնելն է: Այս միջոցառումների նպատակն է իրազեկել երիտասարդությանը ՄԻԱՎ-ի և ՁԻԱՀ-ի հիմնահարցերի վերաբերյալ և ամենակարևորը իրազեկել մարդկանց հետազոտվել»:
Քրիստինե ԳՐԻԳՈՐՅԱՆ
