Աջափնյակ եւ Դավիթաշեն վարչական շրջանների ընդհանուր իրավասության դատարանում, ուր պետք է տեղի ունենար Վազգեն Խաչիկյանի եւ մյուսների գործով արտագնա դատական նիստը, այս գործով Կենտրոն եւ Նորք-Մարաշ վարչական շրջանների ընդհանուր իրավասության դատարանի նորանշանակ դատավոր Մեսրոպ Մակյանը հայտնեց,որ ինքը եւ Վազգեն Խաչիկյանը սովորել են նույն կուրսում, Վ. Խաչիկյանը եղել է իրենց կուրսի ավագը եւ բուհն ավարտելուց հետո ինքը շարունակել է շփվել նրա հետ: Դատավորը խնդրեց կարծիքներ դատավարության կողմերից:
Մեղադրանքը պաշտպանող դատախազ պարոն Հովհաննիսյանը հայտնեց, որ այդ մասին իրենց հայտնի չի եղել, եւ, ըստ էության, ակնարկեց դատարանի ինքնաբացարկի մասին: Պաշտպանական կողմից մի քանիսը, մասնավորապես՝ Երվանդ Վարոսյանը, Հովհաննես Ասրյանը, ինքնաբացարկի հարցը թողեցին դատավորի հայեցողությանը, ավելին՝ հայտնեցին, որ ճանաչելով որպես դատավոր, կողմնակալության մեջ չեն կարող կասկածել: Իսկ պաշտպան Արա Զաքարյանը «պայման դրեց», թե իր պաշտպանյալը գտնվում է անազատության մեջ եւ միջնորդություն ունի անելու նրա խափանման միջոցի հետ կապված եւ այդ հարցը լուծելուց հետո ինքը կանդրադառնա դատավորի ինքնաբացարկին: Այնուամենայնիվ, դատարանը գնաց խորհրդակցական սենյակ՝ օրենքով սահմանված կարգով ինքնաբացարկի հարցը քննելու համար:
Ռուզան ՄԻՆԱՍՅԱՆ
