«Ջուրն ընդամենը կես օրով ենք անջատել: Իզուր մի կենտրոնացեք, մենք մեր գործն ենք անում»,-կառավարության նիստից հետո լրագրողների հետ զրույցում ասաց բնապահպանության նախարար Արամ Հարությունյանը՝ անդրադառնալով «Արարատ ցեմենտ»-ի ջրազրկումին: Ըստ նախարարի, գործարանը դեկտեմբերին նախարարությանը դիմել է՝ ասելով, որ իրենք արտադրական գործընթաց չեն իրականացնում: Եվ քանի որ այդ ժամանակահատվածում էլ ոռոգման սեզոն չէր, ուստի նախարարի պարզաբանմամբ, այդ պատճառով էլ ուսումնասիրության նպատակով կտրել են ջուրը:
Հարցին, թե այդ դեպքում ինչո՞ւ է աղմուկ բարձրացել գործարանի ջրազրկման շուրջ, պարոն Հարությունյանն ասաց՝ «որ մենք այստեղ հավաքվենք ասուլիս տանք»:
Հարցին, հնարավո՞ր է, որ «Արարատ ցեմենտում» ապօրինի ջրառ հայտնաբերեք, պարոն նախարարը ոչինչ չբացառեց: Նա ասաց. «Մենք չպետք է բացառենք, բոլոր դեպքերի համար, դրա համար էլ մենք ուսումնասիրություն ենք անում»: Նախարարի խոսքերով, եթե անգամ ստուգեն գործարանի պատասխանատուների ասածները, որ դեկտեմբերին ջուր չեն օգտագործել, բայց ստուգումների արդյունքում պարզվի՝ օգտագործել են՝ գործարանը նույնպես տուգանվելու է: Արամ Հարությունյանը նաեւ տեղեկացրեց, որ այդ ընթացքում գործարանի ջրամատակարարման թույլտվությունը դեռ երկարացված չէր:
Ըստ նախարարի, այն ջրօգտագործողները, որոնք չեն պահի նորմատիվները, կենթարկվեն պատասխանատվության: Կլինեն տույժեր եւ տուգանքներ:
Կարդացեք նաև
Լուսինե ԲՈՒԴԱՂՅԱՆ
