Երեւանի բնակիչ, 1987թ. ծնված Վահե Մելքոնյանը Վրաստանում ձեռք է բերել 1016 հատ տարբեր տեսակի ակնոցներ, 44 հատ ակնոցի ոսպնյակներ եւ 11 հատ ակնոցի տուփեր՝ ընդհանուր 2 միլիոն 759 հազար 200 դրամ արժողությամբ:
Հայաստան գալուց առաջ նա նշված իրերը բաժանել է 3 մասի,մի մասը թաքցրել իր վարած «ԲՄՎ-525» մակնիշի ավտոմեքենայի բեռնախցիկում տեղադրված գազի բալոնի ծածկոցի հետեւի մասում, մի մասը՝ սրահի նստատեղի հետնամասում, երրորդ մասը՝ հետեւի նստատեղերի ոտնատեղերի մոտ: 2013թ. օգոստոսի 28-ին Վրաստանից Բագրատաշենի անցակետով ժամանելով Հայաստան, նա մաքսային ծառայության աշխատակիցների բանավոր հարցին պատասխանել է, որ հայտարարագրման ենթակա ապրանքներ չունի եւ հիշյալ ապրանքները դուրս է հանել մաքսային հսկողության գոտուց, սակայն իրականացված մաքսային հսկողության արդյունքում ավտոմեքենայից հայտնաբերվել են մաքսանենգությամբ Հայաստան տեղափոխված իրերը: Վ. Մելքոնյանին նկատմամբ քրեական գործ է հարուցվել ՀՀ քրեական օրենսգրքի 215-րդ հոդվածի 1-ին մասով: Նրա նկատմամբ խափանման միջոց է ընտրվել չհեռանալու մասին ստորագրությունը:
Ըստ «Դատալեքս» կայքի՝ մինչ դատաքննությունը սկսվելը Վ.Մելքոնյանը միջնորդել է դատական քննությունն անցկացնել արագացված կարգով եւ հայտարարել է,որ միջնորդությունը ներկայացրել է կամավոր, խորհրդակցել է իր պաշտպանի հետ, գիտակցում է արագացված կարգով դատաքննություն անցկացնելու հետեւանքները, առաջադրված մեղադրանքն իրեն պարզ է, ինքը համաձայն է դրա հետ: Դատարանը բավարարել է միջնորդությունը:
2014թ. փետրվարի 7-ին Տավուշի մարզի ընդհանուր իրավասության դատարանի նախագահ Սամվել Մարդանյանը Վ. Մելքոնյանի նկատմամբ պատիժ սահմանելիս, որպես նրա պատասխանատվությունը եւ պատիժը մեղմացնող հանգամանքներ է համարել նրա կողմից անկեղծորեն զղջալը, նախկինում արատավորված չլինելը, խնամքի տակ անչափահաս մեկ երեխա ունենալը: Դատարանը Վ.Մելքոնյանին մեղավոր է ճանաչել առաջադրված մեղադրանքով եւ դատապարտել 1 միլիոն դրամ տուգանքի: Դատարանը վճռել է կիրառել «ՀՀ անկախության հռչակման 22-րդ տարեդարձի կապակցությամբ համաներում հայտարարելու մասին» ՀՀ ազգային ժողովի 2013թ. հոկտեմբերի 3-ի որոշման 1-ին կետի 2-րդ ենթակետը եւ ամբաստանյալին ազատել տուգանքից: Դատավճռով մաքսային պահեստում գտնվող, մաքսանենգ ձեւով ներկրված 1016 հատ ակնոցները, 44 հատ ակնոցի ոսպնյակները եւ 11 հատ ակնոցի տուփերը կբռնագանձվել են հօգուտ Հայաստանի հանրապետության:
Կարդացեք նաև
Հավելենք, որ Տավուշի մարզի դատարաններում շատ են Վրաստանից Հայաստան հեռախոսների եւ նոթբուքների մաքսանենգ ներկրման գործով դատական գործերը:
Ոսկան ՍԱՐԳՍՅԱՆ
