Այսօր Շիրակի մարզի ընդհանուր իրավասության դատարանը լսեց Վարդան Ղուկասյանի դստեր փեսացուի սպանության մեջ մեղադրվող Հարություն Սարգսյանի երկու փաստաբանների` Լուսինե Սահակյանի ու Հունան Բաբայանի պաշտպանական ճառը: Նշենք, որ չնայած ամբաստանյալը հացադուլ ու ջրադուլ էր հայտարարել` ի նշան բողոքի, սակայն ասաց, որ ի վիճակի է մասնակցել դատական նիստին: Այս անգամ դատին մասնակցում էին երկու կողմերի հարազատներն ու ընկերները: Նույնիսկ Գյումրու քահանաներից մեկն էր նստած դահլիճում:
Լուսինե Սահակյանը, դրվագ առ դրվագ անդրադառնալով Հարություն Սարգսյանին առաջադրված մեղադրանքի բովանդակությանը, ներկայացրեց իր հակափաստարկները` պնդելով, որ Հարություն Սարգսյանը աղերս չունի մարդասպանության հետ: Փաստաբանի պնդմամբ, խանդի հողի վրա սպանություն կատարելու վարկածը չի կարող համապատասխանել իրականությանը, քանի որ ապացուցվել է այն փաստը, որ Հարություն Սարգսյանը Վարդան Ղուկասյանի դստերը չի ճանաչում, ինչպես որ չի ճանաչել նաև նրա փեսացուին` Կարեն Եսայանին: «Ըստ մեղադրանքի, Հարություն Սարգսյանի հայրը գնացել է խնամախոսության ոչ թե Ղուկասյանների տուն, այլ քաղաքապետարան, սա տարօրինակ է, վառ երևակայության դրսևորում», -ասաց փաստաբանը:
Լուսինե Սահակյանը նաև անդրադարձավ Կարեն Եսայանի հոր` Ռազմիկ Եսայանի դատարանում տված այն ցուցմունքին, թե նախքան իր որդու սպանությունը, Գյումրիից Երևան ուղևորվելիս Հարություն Սարգսյանը ճանապարհին հետևել է իրենց իր արծաթագույն «Մերսեդեսով» ու վթարավտանգ իրավիճակ է ստեղծել: «Ռազմիկ Եսայանը այնքան բարոյականություն ունեցող մարդ է, որ սուտ խոսելուց հետո արագ ուղղեց այն `դատարանում հայտնելով, որ ինքը Հարություն Սարգսյանին առաջին անգամ տեսել է ոստիկանությունում: Պատկերացրեք, եթե Ռազմիկ Եսայանը Հարություն Սարգսյանին մինչ այդ տեսար լիներ, ոստիկանությունում նրա հետ հանդիպելիս չէ՞ր ասի` այ տղա, դու էն տղեն չէի՞ր, որ քշում էիր մեքենան մեր վրա: Այս մարդը ստիպված էր սուտ խոսում, բայց էնքան բարոյական գտնվեց, որ արագ հրաժարվեց իր ստից, բայց մեղադրական կողմը շարունակում է պնդել այդ սուտը»-, ասաց Լուսինե Սահակյանը:
Կարդացեք նաև
Փաստաբանը նաև հայտարարեց, որ Հարություն Սարգսյանը «13 TT» համարանիշով մեքենա չի ունեցել, որը այդպես էլ մնաց մեղադրանքի մեջ: Այնուհետ փաստաբանը հայտնեց իր ենթադրությունը առ այն, Կարեն Եսայանին սպանել են ոչ թե ժամը 10.05 սահմաններում, այլ առնվազն 10.40-ից հետո: «Կարեն Եսայանին զանգահարել է ընկերը, սակայն նա այդ ժամին ասել է, որ ծանոթի է հանդիպել, հետո կզանգի ու չի զանգել: Որ այդ ծանոթը չէր կարող Հարությունը լինել, դա արդեն ապացուցված է , նրանք ծանոթ չեն, սակայն այս փաստը նախաքննական մարմնի կողմից անտեսվել է», -ասաց փաստաբանը:
Այնուհետ նա անդրադարձավ փորձաքննությունների արդյունքներին `հայտարարելով, որ Հարություն Սարգսյանի հագուստի վրա կրակոցի արգասիքներ չեն հայտնաբերվել, արյան հետքեր չեն եղել, մինչդեռ, եթե ինչ- որ մեկը նստած լիներ Կարենի կողքին , ապա արյունը պիտի քսմսված լիներ նրա շորերին: «Մեքենայի հետևի մասում հողի ու փոշու հետքեր են եղել և եթե ի նկատի ունենանք, որ Կարեն Եսայանը նոր էր վերցրել իր մեքենան ավտոլվացման կետից, ապա նախաքննական մարմինը այս փաստին ևս ուշադրություն չի դարձրել, թե ում հետքերն էին մեքենայի հետևում»: Ըստ փաստաբանի, Կարեն Եսայանի մեքենայի վրայի մատնահետքերն անգամ չեն համընկել Հարություն Սարգսյանի մատնահետքերին: Դատաքիմիական փորձաքննությամբ Հարություն Սարգսյանի եղունգներից, քթանցքերից, ականջներից վերցված քսուկներում ևս կրակոցի արգասիքներ չեն հայտնաբերվել, ավելին` Կարեն Եսայանի մեքենայի աջ ոտնակի վրա հայտնաբերված հողը, ըստ հողագիտական եզրակացության, եղել է ոչ թե Գյումրու Ալեք Մանուկյան փողոցից, այլ «Մայր Հայաստան» հուշահամալիրից:
«Կրակոցի արգասիքներ չեն հայտնաբերվել նաև ոստիկանության վերցրած հագուստի վրա, մինչ ոստիկանություն գնալը Հարություն Սարգսյանը հասցրել է փոխել միայն ճտքավոր կոշիկները: Նա ամբողջ օրը նույն շորերով է եղել, քանի որ տանը մարդիկ են եկել ու չի հասցրել փոխել: Մեղադրող կողմը ոչ մի ապացույց չկարողացավ ձեռք բերել»,-հայտարարեց Լուսինե Սահակյանը:
Նա նաև նկատեց, որ նախաքննական մարմինը տրամադրված է եղել իր պաշտպանյալի նկատմամբ, քանի որ ապօրինի ձեռնարկատիրական գործունեություն ծավալելու համար պահանջել է նրան պատժել երկու տարի ազատազրկմամբ, մինչդեռ Քրեական օրենսգրքի 188 հոդվածի 1-ին մասը նախատեսում է տուգանք` աշխատավարձի 500-1000 ապատիկի չափով, կամ առնվազն մեկ տարվա ազատազրկում:
Լուսինե Սահակյանն ասաց, որ այսքանից հետո դատախազը ճիշտ կանի ինքնաբացարկ հայտնի ու գնա: Դահլիճում ծափահարություններ հնչեցին: Հարություն Սարգսյանն էլ իր խոսքը կարճ-կոնկրետ ձևակերպեց` ասելով.«Հիմա մարդասպանը կծիծաղի գործ սարքող դատախազի վրա»:
Լուսինե Սահակյանը դատավորին խնդրեց այնպես չանել, որ ծաղր ու ծանակի ենթարկվի արդարադատությունը, ու մարդասպանը ծիծաղի այս գործով բոլոր մասնակիցների վրա: Նա դատավորին հորդորեց արդարացման դատավճիռ կայացնել`չեղյալ համարելով 104 հոդվածի 1-ին մասով առաջադրված մեղադրանքը` սպանություն կատարելը: «Եթե չեղավ արդարացման դատավճիռ, նշանակում է վաղը ցանկացած մեկս կարող ենք մեղադրվել. Ես օրինակ` կարող եմ մեղադրվել բռնաբարություն կատարելու մեջ, կարևոր չէ, որ չէի կարող բռնաբարություն կատարել, նման ապացույցներով մեղադրանքը խայտառակություն է»>, եզրափակեց փաստաբանը:
Մանրամասները` տեսանյութում:
Նունե ԱՐԵՎՇԱՏՅԱՆ
