«Ես Ձեզ առանձին ասել եմ, ուղղակի կրկնեմ, որ որոշակի մտահոգություններ ունեմ նախաձեռնության վերաբերյալ, թե պահի, թե ժամանակի առումով, որովհետև չեմ տեսնում որևէ նախադրյալ, որ մեծամասնությունը որոշակի փոփոխություններ ունի իր մոտեցումներում»,- Մարտի 1-ի հարցը ուսումնասիրելու ժամանակավոր հանձնաժողով ստեղծելու նախագծի քննարկմանն այսօր ԱԺ «Ժառանգություն» խմբակցության պատգամավոր Ալեքսանդր Արզումանյանը հիմնական զեկուցող, ՀԱԿ պատգամավոր Գագիկ Ջհանգիրյանին այս կերպ դիմեց` հավելելով, որ ինքը չի հասկանում, թե ինչո՞վ է պայմանավորված խմբակցության ևս մեկ փորձը՝ նույն «փոցխի վրա կանգնելու»:
Հիշեցնենք, որ անցյալ նստաշրջանում ՀԱԿ-ը կրկին համանման առաջարկով հանդես եկավ, որը մեծամասնության կողմից դարձյալ տապալվեց:
Ալեքսանդր Արզումանյանը նկատեց նաեւ, որ փաստահավաք խմբի զեկույցներից մեկում հստակ փաստեր են բերվել այն մասին, որ մարտի մեկին մասնակցել են ապօրինի զինված խմբեր, իսկ այդ փաստերին այդպես էլ չեն տրվել քաղաքական գնահատականներ. «Հաշվի առնելով, որ այս ընթացքում եղել են պատվերով սպանություններ ու որևէ մեկը չի բացառում, դրանք կարող էին լինել այդ խմբերը, ի՞նչ գնահատական կտաք այս փաստերին»:
Գագիկ Ջհանգիրյանն ի պատասխան ասաց, թե իրենք նախաձեռնել են «Մարտի 1-ի» հանձնաժողով ստեղծել մարտի 1–ին ընդառաջ. «Ես բարոյական պատասխանատվություն ունեմ զոհվածների իրավահաջորդների ծնողների առաջ, չգիտեմ ինչու, բայց դա իմ վրա է ծանրացել: Եթե լիներ նոյեմբերին, կանեինք նոյեմբերին, դեկտեմբերին լիներ՝ կանեինք դեկտեմբերին»:
Անդրադառնալով ապօրինի զինված խմբավորումների մասով հարցին՝ Ջհանգիրյանը նշեց. «Այո՛, մեղմ է ասել, որ ես ծանոթ եմ փաստահավաքի այդ զեկույցին, ես մանրամասն ուսումնասիրել եմ, գիտեմ, որ տեղեկատվություն է ներկայացված, որ այդ օրերին որոշ անձանց ՊՆ հանդերձանքի պահեստից տրվել են համազգեստներ: Եթե հագուստ է տրվում, ապա սպառազինության պահեստներից էլ պետք է զենք հատկացվի: Ցավոք, փաստահավաքի փորձերը հանդերձանքի պահեստում ուսումնասիրել գրանցամատյանները համազգեստների տրման վերաբերյալ մատնվեցին ձախողման, թույլ չտվեցին, թեև առկա էր ուղակի հանձնարարական, որ պետք է օժանդակեն»:
Նելլի ԳՐԻԳՈՐՅԱՆ
