Ազգային ժողովում Մարտի 1-ի հարցով ժամանակավոր հանձնաժողով ստեղծելու հարցի քննարկման ժամանակ ՀԱԿ խմբակցության անդամ Հրանտ Բագրատյանը հիմնական զեկուցող Գագիկ Ջհանգիրյանին հարցրեց՝ Մարտի 1-ի և Մայդանի դեպքերի միջև նմանություն տեսնո՞ւմ է: Բագրատյանը նաեւ հետաքրքրվեց`Հայաստանում հնարավո՞ր է Մայդանի կրկնություն: Գագիկ Ջհանգիրյանը նշեց, որ նմանություններ չկան, իսկ Հայաստանում մայդան չի կարող լինել: Նա ասաց, որ Բագրատյանը ՀԱԿ խմբակցության անդամ է և պետք է լավ ծանոթ լինի ՀԱԿ առաջնորդի տեսակետին, որ Հայաստանում հակառուսական նման խոշոր ընդվզում չի կարող լինել: Գագիկ Ջհանգիրյանն ասաց, որ կիսում է ՀԱԿ առաջնորդի այդ կարծիքը:
«Պարոն Ջհանգիրյան, դուք երևի լավ տեղյակ չեք, թե ինչ է Մայդանը: Մայդանում մարդիկ արտահայտել են ժողովրդի կամքը, Հայաստանում էլ ժողովուրդն իրավունք ունի արտահայտելու իր կամքը: Չեմ կարծում որ, Հայաստանում Մայդան հնարավոր չէ, պետք չէ դա ընդունել երևույթ, որն անպայման ուղղված է ռուսների դեմ»,- ասաց Հրանտ Բագրատյանը: «Պարոն Բագրատյան, դուք Ուկրաինա շատ եք գնում-գալիս, դուք կիմանաք, ես Մայդանի մասնագետ չեմ»,- պատասխանեց Ջհանգիրյանը:
Նելլի ԳՐԻԳՈՐՅԱՆ
