«Գիտեմ, որ այդ մասին խմբակցության ղեկավարի հետ խոսվել է, առաջարկվել է վերանայել այդ մոտեցումը: Սակայն մեր մոտեցումը խիստ սկզբունքային է, մեր պայքարի եղանակն էլ դա է»,- «Առավոտին» ասաց ՀԱԿ խմբակցության պատգամավոր Լյուդմիլա Սարգսյանը:
Խոսքը ԱԺ էթիկայի հանձնաժողովում ՀԱԿ-ի ներկայացուցչի աշխատանքը վերականգնելու մասին է: Նախորդ նստաշրջանում այդ հանձնաժողովում ընդդիմությունը մեծամասնություն ուներ եւ սկզբնական շրջանում բավական արդյունավետ աշխատեց: Այնուհետեւ քաղաքական մեծամասնությունը, ձեռնպահ մնալով իր գործընկերների հավանական լրացուցիչ հրապարակային պախարակումներից, փոփոխություններ կատարեց` փոխելով համամասնությունը հօգուտ ՀՀԿ-ի: Արդյունքում ՀԱԿ-ը դադարեցրեց իր մասնակցությունը հանձնաժողովին` կոչ անելով մյուս ոչ իշխանական ուժերին հետեւել իր օրինակին, ինչն առիթ կտա մեծամասնությանը հարցը վերանայել: Սակայն՝ ապարդյուն:
«Առավոտ» օրաթերթ
