ՀՀԿ խմբակցության պատգամավոր Մարգարիտ Եսայանը այսօր ԱԺ նիստի ընթացքում առաջարկեց մեկ րոպե լռությամբ հարգել Մարտի 1-ի զոհերի հիշատակը: Ներկաները ոտքի կանգնեցին, ՀԱԿ պատգամավոր Նիկոլ Փաշինյանը, սակայն, այդ պահին դուրս եկավ դահլիճից: «Ես չմասնակցեցի լռության րոպեին եւ դուրս եկա դահլիճից, որովհետեւ այսօր ԱԺ դահլիճում նստում են մարդիկ, ովքեր ուղղակի կապ ունեն Մարտի 1-ի սպանությունների կազմակերպման եւ իրագործման հետ, մարդիկ, ով անձամբ տվել են ՀՀ քաղաքացիներին գնդակահարելու հրամաններ, բացառված չէ անգամ՝ գտնվեն անմիջական կատարողներ: Նրանց հետ կողք-կողքի Մարտի 1-ի զոհերի հիշատակի լռության րոպեին մասնակցելը, իմ ընկալմամբ, անարգանք կլիներ զոհերի հիշատակի առաջ: Այս մասին կխոսեմ նաեւ իմ ելույթում»,- լրագրողների հետ զրույցում իր քայլն այսպես մեկնաբանեց պատգամավորը:
Լրագրողներից մեկի դիտարկմանն, արդյոք սա պատասխա՞նն էր մի քանի օր առաջ Ուկրաինայի զոհերի հիշատակը հարգելու Լեւոն Զուրաբյանի առաջարկի առիթով Մարգարիտ Եսայանի արտահայտած տեսակետին, Փաշինյանն ասաց, որ իր քայլը նախկին դեպքի պատասխանը չէ, այլ կոնկրետ փաստի արձանագրում:
Նելլի ԳՐԻԳՈՐՅԱՆ
