Այսօր գյուղնախարար Սերգո Կարապետյանի կողմից ոսկե մեդալով պարգևատրված Շիրակի մարզի Բասեն գյուղի գյուղապետ Համլետ Պետրոսյանը նախարարին հյուրընկալեց նաև իր գյուղում գտնվող ոչխարների ֆերմա: Լրագրողների հետ զրույցում էլ գյուղապետը ներկայացրեց իր մտահոգությունները անասնապահական այս ճյուղի զարգացման վերաբերյալ:
«Մեր գործունեությունը, ընդհանուր առմամբ կարելի է գնահատել դրական, միայն թե որոշակի պահեր կան բրդի իրացման, անասնագլխաքանակի միանգամից տանելու հետ կապված, խնդիրներ ունենք, բայց ոչինչ, դրանք բոլորը հարթվող են: Մենք նախագիծ ենք ներկայացրել փոքր ու միջին բիզնեսի զարգացման ծրագրով բրդի վերամշակման, դզող-քրքրող լվացնող սարքեր ձեռք բերելու համար: Մեր ամբողջ եկամուտը բրդի ու գառի մեջ է, որպեսզի կարողանանք ավելի եկամտաբեր դարձնել ոչխարապահությունը, գառը արդեն իսկ սկսել ենք իրացնել, բուրդն էլ չենք ուզում ոչնչացնել:
Տարածաշրջանում, եթե մենք կարողանանք տեղադրել բրդի գզող-քրքրող վերամշակող սարքերը, բավականին լուրջ արդյունքներ կունենանք, բուրդը կարող ենք ներկրել և վերամշակել, նույնիսկ արտադրություն կազմակերպել վերմակների»,- ասաց գյուղապետը:
Ըստ Համլետ Պետրոսյանի, իրենց գնորդները` պարսիկները, այս տարի չեն գնել ոչխարները` պատճառաբանելով, թե կարմիր ու սև չեն, իրենք էլ խորամանկ քայլ են արել, Արմավիրի մարզից կարմիր խոյեր են բերել, որպեսզի ապացուցեն, որ կարմիր ոչխար ունենալն էլ իրենց համար պրոբլեմ չէ:
«Ամեն ինչ էլ ունենք, մենակ թե իրացրեք»,- եզրափակեց գյուղապետը:
Կարդացեք նաև
Նունե ԱՐԵՎՇԱՏՅԱՆ
