Հայ-վրացական պետական սահմանի` «Բագրատաշեն» եւ «Սադախլո» անցման կետերում կներդրվեն սահմանների համալիր կառավարման եվրոպական չափանիշներ: Այս մասին տեղեկանում ենք կառավարության նիստի օրակարգից: Ինչպես Պետեկամուտների կոմիտեի ղեկավար Գագիկ Խաչատրյանն է վստահեցնում, ծրագրի նպատակն է նպաստել միջազգային առեւտրի եւ տարանցիկ փոխադրումների զարգացմանը՝ միաժամանակ ապահովելով սահմանների անվտանգությունը: Ծրագիրն իրականացվում է Եվրամիության եւ ՄԱԿ-ի զարգացման աջակցության ծրագրի օգնությամբ: Ծրագրի ավարտին միջազգային մեր գործընկերներն ակնկալում են, որ սահմանների համալիր կառավարման (ՍՀԿ) ռազմավարությունը եւ օրենսդրական դաշտը ՀՀ-ում եւ Վրաստանում կհամապատասխանեցվեն Եվրամիության ՍՀԿ սկզբունքներին: Ըստ նույն աղբյուրի, սահմանային կետերի միջին օղակի ղեկավար անձնակազմը պատրաստություն կանցնի հերթափոխերի կազմակերպման, արտակարգ իրավիճակների կառավարման ոլորտներում:
Լուսինե ԲՈՒԴԱՂՅԱՆ
