«Կարծում եմ, որ Թուրքիայի ԱԳՆ ներկայացուցիչ, Եվրախորհրդի նախկին նախագահ Մեւլուդ Չավուշօղլուի արտահայտած դիրքորոշումը լիովին տեղավորվում է Թուրքիայի «եվրասիական խաղերի» շրջանակներում»,- Aravot.am-ի հետ զրույցում այսպես մեկնաբանեց Թուրքիայի ԱԳն ներկայացուցիչ, Մեւլուդ Չավուշօղլու արած հայտարարությունը «Ժառանգություն» կուսակցության մամլո խոսնակ Հովսեփ Խուրշուդյանը։
Հիշեցնենք՝ Չավուշօղլին հայտարարել էր, թե Եվրամիության դիրքորոշումը Ուկրաինայի հանդեպ սխալ է։
Հովսեփ Խուրշուդյանի խոսքերով՝ այդ ուղերձը հերթական փորձն է Եվրոպայի վրա ճնշում գործադրելու՝ ԵՄ-ին իր անդամակցության հարցն արագացնելու նպատակով, ըստ էության, շանտաժ անելով վերջիններին իր՝ Ռուսաստանի հետ մերձենալու հեռանկարով.
«Ի դեպ, պետք է հիշեցնեմ, որ Չավուշօղլուն ժամանակին ԵԽ նախագահ դարձավ ԵԽ-ում հայկական պատվիրակության անգործության եւ անգամ խրախուսման պայմաններում, երբ միակ հայ պատվիրակը, ով պայքարեց նրա ընտրության դեմ «Ժառանգության» ներկայացուցիչ Զարուհի Փոստանջյանն էր»։
Կարդացեք նաև
Իսկ այն հարցին, թե հնարավո՞ր է Թուրքիայի եւ Ռուսաստանի մերձեցումը, պարոն Խուրշուդյանը պատասխանեց, որ չի բացառում.
«Քանի որ իրենց էությամբ Թուրքիան եւ Ռուսաստանը մնացել են կայսերական-մեծապետական քաղաքականության ճիրաններում եւ դրանով իրար շատ նման են եւ հոգեհարազատ: Մանավանդ, որ հիմա Էրդողանի կառավարությունը Արեւմուտքի, հատկապես՝ ԱՄՆ-ի ճնշումներին է դիմակայում: Սակայն, ամեն դեպքում, հակադիր շահերը, կարծում եմ, ավելի շատ են եւ այս ուղերձը ավելի շատ Արեւմուտքին պահեկան շանտաժ անելու համար է»:
Ամի ՉԻՉԱԿՅԱՆ
