25 փետրվարի 2014, Երևան: Ավագանու «Բարև Երևան» խմբակցության ղեկավար Անահիտ Բախշյանը քաղաքապետ Տարոն Մարգարյանին խնդրել էր տրամադրել Երևանի թիվ 27 դպրոցի տնօրենի ժամանակավոր պաշտոնակատար Լիլյա Օհանյանի հրամանը՝ ուսուցչուհի Սուսաննա Սարգսյանին աշխատանքից ազատելու մասին: Քաղաքապետը նախապես տեղեկացրել էր, որ փետրվարի 13-ին հանձնարարական է իջեցվել Սուսաննա Սարգսյանին մանկավարժի զբաղեցրած պաշտոնից ազատելու հարցը օրենքով սահմանված կարգով լուծելու համար: Մինչդեռ այսօր տրամադրվել է հրամանի պատճենը, որը տրվել է ս.թ. փետրվարի 24-ին: Հիշեցնենք, որ Սուսաննա Սարգսյանը թիվ 27 դպրոցի նախկին տնօրենն էր և դատապարտվել էր պետական միջոցներից խոշոր չափով գումար յուրացնելու համար:
Օրեր առաջ մեկ այլ նամակով Անահիտ Բախշյանին էր դիմել Երևանի Մ. Մեծարենցի անվան թիվ 146 դպրոցի գրադարանավարուհին՝ հայտնելով, որ դպրոցների աշխատողների հաստիքների կրճատումների պատճառով իր հաստիքը կրճատվում է՝ 1-ից դառնալով կես: Տիկին Բախշյանը նամակ ուղարկեց քաղաքապետ Տարոն Մարգարյանին՝ հղում կատարելով ՀՀ տարածքային կառավարման նախարար, փոխվարչապետ Արմեն Գևորգյանի՝ քաղաքապետին ուղղված հանձնարարականին, ըստ որի՝ 101-300 աշակերտ ունեցող դպրոցներում գրադարանավարն իրավունք ունի աշխատելու 1 հաստիքով: Իսկ վերոնշյալ դպրոցում սովորում է շուրջ 270 աշակերտ: Դիմումին ի պատասխան քաղաքապետի խորհրդականը հայտնել է, որ գրադարանավարուհու 1 հաստիքը վերականգնվել է:
Երեւան քաղաքի ավագանի
«Բարեւ Երեւան» խմբակցություն
