Այսօր Դավիթաշեն -Աջափնյակ վարչական շրջանների դատարանում պետք է կայանար Սյունիքի նախկին մարզպետ Սուրիկ Խաչատրյանն ընդդեմ Գորիսի նախկին քաղաքապետ Սամվել Հարությունյանի հայցի քննությունը:
Ներկայացել էր միայն հայցվոր կողմի ներկայացուցիչ Մարտին Զիլֆուղարյանը:
Սամվել Հարությունյանը գրություն էր ուղարկել, որի համաձայն, նրա պաշտպան Մուշեղ Շուշանյանը առողջական խնդիրներ ունի, եւ չեն կարողանա ներկայանալ դատարան, խնդրում են հետաձգել դատական նիստը:
Հայցվոր կողմը չառարկեց: Հաջորդ դատական նիստը նշանակվեց մարտի 27-ին:
Հիշեցնենք, որ Սուրիկ Խաչատրյանը դատական հայց է ներկայացրել ընդդեմ Սամվել Հարությունյանի, ըստ որի Գորիսի նախկին քաղաքապետը զրպարտել է իրեն՝ Aravot.am-ին տված մի քանի հարցազրույցների միջոցով, մասնավորապես ՝ «Սուրիկ Խաչատրյանը կրակել է իրենից հղի սիրուհուն ու սպանել չծնված երեխային» հրապարակմամբ:
Հռիփսիմե ՀՈՎՀԱՆՆԻՍՅԱՆ
