Շուրջ 15 տարի է, ինչ հայ հանդիսատեսը հնարավորություն ունի ունկնդրել կանադահայ ճանաչված կլարնետահար Համբարձում Ճապուրեանին: Առաջին անգամ երաժիշտը հայրենիք հրավիրվեց 2010թ.՝ մասնակցելու հայ առաջին տպագիր գրքի 500-ամյակին նվիրված միջոցառումներին: Հետո արդեն տարբեր երկրներում բեղուն համերգային գործունեություն ծավալած երաժշտի հյուրախաղային գրաֆիկում իր մշտական տեղը գտավ Հայաստանը: Երկար տարիներ ուսումնասիրելով դուդուկը, նա համերգներում համատեղում է հայկական հնագույն նվագարանը կլարնետի հետ: Այս առիթով նշենք 2008թ. հանրահայտ սոպրանո Իզաբել Բայրաքդարյանի հետ Ճապուրեանի համերգները Հյուսիսիային Ամերիկայում: Նրա համար արտերկրյա ու հայ կոմպոզիտորների (Կոմիտաս, Սպենդիարյան, Խաչատրյան եւ այլն), կլարնետի եւ դուդուկի համար փոխադրումներ են կատարում ճանաչված կոմպոզիտորներ Ալեքսանդր Բոզնյակովը, Քրիստոֆեր Բ. Ջ. Սմիթը, Ռուբեն Ալթունյանը, Ստեփան Շաքարյանը եւ այլն:
Համբարձում Ճապուրեանն CD-ների իր հավաքածուն 2006թ. ավելացրեց Հայաստանում ձայնագրված միջնադարյան տաղերով:
Վերջերս նա հայաստանցի կոլեգաների, ջութակահարներ Տիգրան Մաթեւոսյանի, Լեւոն Մարկուպչյանի, թավջութակահար Լեւոն Առաքելյանի եւ կոնտրաբասահար Կարեն Խաչատրյանի հետ համերգներով հանդես եկավ Գյումրիում, Արմավիրում, Աբովյանում եւ Արամ Խաչատրյանի տուն-թանգարանում:
«Առավոտի» հետ զրույցում Համբարձում Ճապուրեանը շեշտելով մարզային համերգների կարեւորությունը, հորդորեց հայաստանցի իր կոլեգաներին, պետական միջոցառումներին զուգահեռ՝ սեփական նախաձեռնություն հանդես բերել եւ ուշադրության կենտրոնում պահել մարզային մշակութային կյանքը նույնպես:
ՍԱՄՎԵԼ ԴԱՆԻԵԼՅԱՆ
«Առավոտ» օրաթերթ
