«Մեզ չպետք է մտահոգի այն, որ այնտեղ տեղի ունեցածը կարող է նաև մեր երկրում տեղի ունենալ», – հայտարարել է Բելառուսի նախագահը:
Ռուսաստանի գլխավոր ռազմավարական գործընկեր ու ամենահավատարիմ դաշնակից՝ Ուկրաինայի հարևան երկիր Բելառուսի նախագահը հայտարարել է, թե չնայած տեղի ունեցող իրադարձություններին՝ Ուկրաինան պետք է ամբողջական լինի:
Նախօրեին Մինսկում Հաղթանակի հուշակոթողի մոտ հավաքվածների հետ զրույցում անդրադառնալով ուկրաինական իրադարձություններին՝ Ալեքսանդր Լուկաշենկոն, մասնավորապես, ասել է․ – «Բելառուսի և Ուկրաինայի նպատակները նույնն են: Ուկրաինան պետք է ամբողջական լինի, և ոչ ոք չպետք է կազմաքանդի այդ հսկա երկիրը»:
Բելառուսի ռուսախոս նախագահը, ով, ի դեպ, միայն բելառուսերեն է խոսում երկրի ընդդիմության հասցեին արտահայտվելիս, իր խոսքում նշել է, որ Ուկրաինայի և Բելառուսի խնդիրները տարբեր են, և Մայդանն էլ իրենց համար նորություն չէ: «Եվ մեզ չպետք է մտահոգի այն, որ այնտեղ տեղի ունեցածը կարող է նաև մեր երկրում տեղի ունենալ: Մեզ պետք է մտահոգի այն, թե ինչպես է մեր ժողովուրդն այնտեղ հաղթահարելու այդ ծանր ճգնաժամը: Դա շատ ծանր է, և դա դեռ միայն սկիզբն է», – ասել է Լուկաշենկոն՝ հիշեցնելով, թե 2010 թվականին նույնը փորձում էին անել նաև Բելառուսում:
Կարդացեք նաև
Մանրամասն կարող եք կարդալ` «Ազատություն» ռ/կ-ի կայքում
