Այսօր «Peoplemeter» մամուլի ակումբում Արևելյան գործընկերության քաղաքացիական հասարակության ֆորումի Հայաստանի ազգային համակարգող, Երևանի մամուլի ակումբի նախագահ Բորիս Նավասարդյանը փորձեց վերլուծել այն ամենն, ինչ տեղի է ունենում Ոկրաինայում արդեն մի քանի ամիս: Նա շեշտը դրեց այն զարգացումների վրա, որոնք նաև մոտ են Հայաստանին: Վերջին ժամանակներս համացանցում ակտիվ քննարկում էին հայ քաղաքական գործիչների քննադատական կարծիքները Ուկրայինայում տեղի ունեցող դեպքերի վերաբերյալ: Բ. Նավասարդյանի խոսքերով այդ քննադատությունը տեղին է. «Ուկրաինայում կան գործիչներ, որոնք կարող են այդ հարցերով զբաղվել, իսկ մենք, ավելի ճիշտ կլինի, որ կենտրոնանանք Հայաստանի վրա: Այդ փուլն արդեն եկել է»:
Ուկրաինայում տեղի ունեցող զարգացումները Բորիս Նավասարդյանը կարևոր համարեց նաև Հայաստանի համար: Քանի որ թե՛ Ուկրաինայի և թե՛ Հայաստանի քաղաքական գործիչները կենտրոնացած են միայն իրենց, այլ ոչ թե հասարակության կարծիքը հաշվի առնելու վրա: «Սա էր պատճառը, որ Ուկրաինայում ակտիվ քաղաքացիները, որոնք երբեք իրենց չէին տեսնում քաղաքականության մեջ, այսօր թելադրում են զարգացումների ընթացք, և քաղաքական գործիչները ստիպված են հարմարվել այդ պահանջներին, և բոլորովին էլ պատահական չէ, որ միակ գործիչը, որը համաձայնել է մասնակցել նախագահական ընտրություններին, Յուլիա Տիմոշենկոն էր, որը լիարժեք զգում էր պահանջները, և իր բոլոր քայլերն ու հայտարարությունները համապատասխանեցնում էր այդ պահանջներին»,- ասաց Նավասարդյանը:
Ուկրաինան մեծ պետություն է, այն այժմ գտնվում է աշխարհաքաղաքական առումով շատ կարևոր տարածաշրջանում և աշխարհագրական կետում: Բորիս Նավասարդյանի խոսքերով այն, ինչը տեղի է ունենում Ուկրաինայում, մեծ ազդեցություն է ունենալու նաև ուժերի բալանսի համար՝ եվրոպական և եվրասիական տարածքում.«Ուկրաինան համարվում է այն երկիրը, որի շուրջ զարգացող իրադարձությունները ցույց կտան, թե որ ինտեգրացիոն մոդելն է տիրապետում նախաձեռնությանը: 2013թ.-ի երկրորդ կեսին թվում էր թե եվրասիական նախագիծն էր ավելի նախաձեռնող և արդյունավետ, բայց 2014-ի սկիզբը հակառակ ուղղությամբ շրջեց այդ կարծիքը»:
Չնայած Կիևի հակառուսական վերաբերմունքին եվ Գերագույն Ռադայի՝ նախագահին պաշտոնից ազատելու որոշմանը՝ Ղրիմի կառավարությունը չի ընդունում Գերագույն Ռադայի որոշումը: Ղրիմի ինքնավար հանրապետության փոխվարչապետ Ռուստամ Տեմիրգալիեւը հայտարարել էր, որ Ռադայի ընդունած նոր օրենքներն անօրինական են: Այն հարցին, թե արդյոք հնարավո՞ր է, որ Ղրիմն անջատվի Ուկրաինայից, Նավասարդյանը պատասխանեց. «Ղրիմը այսօրվա իշխանությունների ամենաբարդ խնդիրն է, քանի որ այնտեղի բնակչության մեծամասնությունը գերադասում է լինել Ռուսաստանի մաս, սակայն այս հակամարտությունը ուժային լուծում չի գտնի: Այն իշխանությունը, որը ձևավորվում է հիմա Ուկրաինայում, չի գնա ուժային ճնշումների ճանապարհով: Ինչ լուծում էլ գտնվի, ուժային մեթոդներ չեն գործադրվի»:
Կարդացեք նաև
2014 թվականի սկզբում Ուկրաինայի նախագահի պաշտոնակատարը հստակ հայտարարեց, որ Ուկրաինան վերադառնում է Եվրաինտեգրացիոն իր նախկին քաղաքականությանը: «Առավոտի» այն հարցին, թե ինչ ազդեցություն կունենա Հայաստանի վրա Ուկրաինայի՝ Ասոցացման պայմանագիրը ստորագրելը, և, թե ինչ ազդեցություն կունենա , եթե Ուկրաինան մտնի Մաքսային միություն, պրն Նավասարդյանը պատասխանեց. «Եթե Ուկրաինան մտներ Մաքսային միություն, մենք կկորցնեինք վերջին հույսը, որ կարող է չեղյալ համարվել Մաքսային միության հետ կնքած գործարքը: Այսինքն՝ մոտակա մի քանի տարիների ընթացքում, մենք կորցնում ենք մեր իրական ինքնիշխանությունը: Եթե Ուկրաինան գնա ասոցացման պայմանագիրը ստորագրելու ճանապարհով, այնտեղ կձևավորվի նոր կառավարություն: Սա նշանակում է, որ մենք դեռ կարող ենք պահպանել բնական և արդյունավետ զարգացման ուղի վերադառնալու հույսեր»:
Լիլիթ ՀԱՐՈՒԹՅՈՒՆՅԱՆ
