Հայաստանի գործատուներն ու աուդիտորները շարունակում են անորոշության մեջ գտնվել` վճարե՞լ պարտադիր կուտակային վճարները, թե՞ ոչ:
«Մենք հայտնվել ենք այն վիճակում, որ ճար չունենք: Ինքնաշխատ տարբերակով ավտոմատ համակարգը տանում է այդ գումարը », – «Մեդիալաբին» ասում է կազմակերպություններից մեկի հաշվապահը, ով նախընտրեց անանուն մնալ:
Հաշվապահը նշում է, որ էլեկտրոնային հաշվետվությունը հնարավոր չի ուղարկել` առանց տվյալ դաշտը լրացնելու:
«Քաղաքացու` պարտադիր կուտակայինի մասնակից լինելու դեպքում, էլեկտրոնային համակարգը հաշվում է եւ եկամտային հարկը եւ կուտակային վճարը տվյալ ֆիքսված աշխատավարձից, մենք ոչինչ չենք կարող անել», -նշում է նա:
Քաղաքացուց գանձված պարտադիր կուտակային վճարը գործատուն պարտավոր է փոխանցել ֆինանսների նախարարությունում բացված հատուկ գանձապետական հաշվին, որը այսպես ասած, կամուրջ հաշիվ է:
Կարդացեք նաև
Տեղեկացնենք, որ այս տարի հունվարի 1-ից ուժի մեջ մտած պարտադիր կուտակային կենսաթոշակային համակարգով, 1974 թվականի հունվարի 1-ից հետո բոլոր ծնվածները պարտավոր են աշխատավարձի 5-10%-ը փոխանցել կուտակային ֆոնդերին, որը տարիներ անց կվճարվի որպես կենսաթոշակ:
Սակայն, ներդրված նոր համակարգը բուռն դժգոհություն է առաջացրել հասարակության տարբեր շերտերի, ոչ իշխանական քաղաքական ուժերի մոտ:
Հիշեցնենք, որ ֆինանսների նախարարությունը փետրվարի 18-ին հիշեցրել էր գործատուներին, որ նրանք որպես հարկային գործակալ, կուտակային վճարները հաշվարկելու և փոխանցելու պարտականություն ունեն: Նախարարությունը նաեւ նշել էր վերջնաժամկետը` փետրվարի 19-ը։
Իրավաբան Արա Ղազարյանը ֆինանսների նախարարության այս հիշեցումը ուղղակի ճնշում է համարում գործատուների վրա:
Նրա խոսքով, ըստ էության , փոխանցում կատարելով, խախտվում է Սահմանադրական դատարանի աշխատակարգային որոշումը, որով մինչեւ օրենքի «պարտադիր» բաղադրիչի սահմանադրականության հարցերի որոշումը, ՍԴ-ն կասեցրեց «Կուտակային կենսաթոշակային պարտադիր համակարգի մասին» օրենքի 76-րդ հոդվածի և 86-րդ հոդվածի 3-րդ մասի գործողությունը:
Հիշեցնենք, որ օրենքի 76-րդ հոդվածը պատասխանատվություն է սահմանում պարտադիր կուտակային վճարները չկատարելու կամ ուշացումով կատարելու դեպքում: Իսկ 86-րդ հոդվածի 3-րդ մասը վերաբերում է պարտադիր կուտակային բաղադրիչի մասնակիցների կողմից ֆոնդի և կենսաթոշակային ֆոնդի կառավարչի ընտրությանը:
Նյութի մանրամասները կարդացեք «Մեդիալաբ»-ի կայքում
